IGIHE.com > Amakuru > U Rwanda
Abatwara abagenzi barishimira imikorere mishya yashyizweho na RURA mu kazi kabo

Abatwara abagenzi barishimira imikorere mishya yashyizweho na RURA mu kazi kabo


Yanditswe kuya 11-01-2013 - Saa 10:26' na Emile Nsabimana & Olivier Rubibi

Mu gihe guhera muri Gashyantare uyu mwaka ibigo bitwara abagenzi mu Rwanda bizahabwa imihanda ntarengwa bigomba gukoreramo, abatwara abagenzi mu modoka bavuga ko iki cyemezo kizakemura ibibazo byinshi byagaragaraga mu buryo bwari busanzwe harimo n’icy’impanuka akenshi zaterwaga no gusiganwa hashakwa abagenzi.

Uburyo bushya bwo gutwara abagenzi nk’uko ikigo gishinzwe kugenzura imirimo imwe n’imwe ifitiye igihugu akamaro mu Rwanda RURA kibitangaza, buha ikigo runaka gitwara abagenzi gutwara abantu bagana mu cyerekezo kimwe ; bitandukanye n’uko byakorwaga ugasanga umuhanda umwe ukorerwamo n’ibigo byinshi.

Ngarambe Charles ukuriye ishyirahamwe ryo gutwara abantu hakoreshajwe imodoka mu Rwanda, yadutangarije ko uburyo bwari busanzwe bwatumaga abatwara abagenzi barwanira abatega imodoka ; rimwe na rimwe bikanatera ibibazo birimo impanuka.

Agaragaza uko yakiriye icyemezo cya RURA, Ngarambe yabwiye IGIHE ati “Iki cyemezo kizavanaho kurwanira abagenzi byari bisanzwe bikorwa ahari ‘agence’ [ibigo bitwara abagenzi] nyinshi. Bizanavanaho ikibazo cy’impanuka kuko abenshi mu bakoraga impanuka babaga bafite umuvuduko munini batanguranwa abagenzi.”

Icyakora hari abagenzi bari batewe impungenge n’iki cyemezo bashingiye ku kuba hari aho kivuga ko niba imodaka itwara abantu bava nk’i Kigali bajya i Nyagatare nta muntu w’i Kayonza igomba gutwara.

Kuri ibi Ngarambe avuga ko ibi bitakabateye impungenge, kuko ugomba gutwara abagenzi mu muhanda Kigali-Nyagatare kimwe no mu yindi mihanda miremire azajya ategura n’uko hajyaho imodoka iva i Kayonza ijya i Nyagatare. Ibi kandi bikabigomba no gukorwa mu bice byose by’igihugu.

Muri iyi gahunda izatangira gukurikizwa muri Gashyantare uyu mwaka, nta kigo gitwara abagenzi cyemerewe gutwara umuntu uterekeza aho RURA yakigeneye. Urugero ni nk’igihe ikigo cyemerewe gutwara abantu ku muhanda Kigali-Huye, aha bikaba bitemewe ko imodoka y’iki kigo yagera nk’i Muhanga cyangwa mu Ruhango ngo ifate abandi bagenzi.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO