IGIHE.com > Amakuru > U Rwanda
29 biyita abarwanyi  ba M23 bangiwe kwinjira ku butaka bw’u Rwanda

29 biyita abarwanyi ba M23 bangiwe kwinjira ku butaka bw’u Rwanda


Yanditswe kuya 15-07-2012 - Saa 10:48' na Jotham Ntirenganya

U Rwanda rwasubije inyuma abiyita inyeshyamba 29 zo muri M23 zarambitse intwaro hasi, ariko 7 bo muri FDRL bari bazanye bemererwa gutahuka, nk’uko byatangajwe na Minisiteri y’Ingabo mu itangazo yashyize ahagaragara kuri uyu wa Gatandatu itariki ya 14 Nyakanga 2012.

Minisiteri y’ingabo z’u Rwanda ivuga ko impamvu nyamukuru yo kwanga ko abarwanyi ba M23 bahita binjira mu Rwanda, ari uko MONUSCO itanyuze mu nzira zabugenewe ntinamenyeshe u Rwanda hakiri kare, kandi ngo hari n’abataramenyekana neza imyirondoro.

Abo barwanyi 29 bavuga ko baturutse mu mutwe wa M23, hamwe n’abandi barwanyi 7 baturutse mu mutwe wa FDLR bari bijyanye ku birindiro by’ingabo za MONUSCO, bagezwa ku mupaka w’u Rwanda kuri uyu wa Gatandatu.

Itangazo rya Minisiteri y’Ingabo rigenewe abanyamakuru rivuga ko muri bo harimo 11 bari mu igenzurwa binyuze mu bufatanye buri hagati y’u Rwanda na Congo, ariko hakabamo n’abandi 18 batazwi neza aho baturuka. Abo muri FDLR uko ari 7 bamaze kwemerwa nk’abashyize intwaro hasi, cyangwa abasezeye igisirikare bakaba bagomba gutahuka.

Umuvugizi w’Ingabo z’u Rwanda Brig Gen. Joseph Nzabamwita yagize ati: “Igitekerezo cya MONUSCO cyo gucyura izi ngabo tutabimenyeshejwe ntibyubahirije amategeko, kandi ni ukwica amabwiriza ngenderwaho. Naho 29 bavugwaho kumanika amaboko ubu bari gukorerwa igenzura hagati y’ubuyobozi bwa Congo n’u Rwanda. Abandi 18 basigaye nta na kimwe tubaziho ndetse n’ubwenegihugu bwabo ntiturabumenya, ku bw’ibyo twasabye Congo ko yadufasha gukurikirana tukamenya inkomoko y’abo bose, kandi twizeye ko ibyo bizakorwa mu mucyo”.

Amakuru dukesha Radiyo Okapi avuga ko abarwanyi ba M23 basanze ingabo za Loni(Monusco) mu gace ka Rutshuru bavuga ko bashyize intwaro hasi kandi ko bashaka gutahuka mu Rwanda, kandi ko bashaka gutaha badafite intwaro, batakiri n’abasirikare.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO