Abanyemari ntibakwiye kumva ko imari ishorwa mu bucuruzi gusa

Mu nama yahuje abikorera, abayobozi b’inzego z’ibanze, RDB na RALGA mu kurebera hamwe uburyo habaho ubufatanye hagati y’izi nzego mu guteza imbere igihugu ; Minisitiri w’intebe Dr Habumuremyi Pierre Damien yashishikarije abikorera gucuka kuri Leta bakishakamo ibisubizo.

Muri iyi nama yarimo abayobozi b’intara, uturere, n’abashoramari batandukanye, haganiriwe ku buryo haramutse habayeho ubufatanye bwiza hagati y’abikorera n’inzego z’ibanze igihugu cyatera imbere bityo ijambo kwigira rikarushaho gutezwa imbere hadategerejwe inkunga.

Nkubiri Alfred ukora ibikorwa by’ishoramari mu buhinzi n’ubworozi byo gucuruza ikawa mu turere turenga 10, yasabye abashoramari kutumva ko bajya mu mahanga kurangurayo ibyo bacuruza gusa, ko ahubwo banashora imari yabo mu giturage mu buhinzi kuko kuko na bwo bwinjiza.

Minisitiri w’intebe yasabye abashoramari bo mu Rwanda n’abikorera muri rusange kumva ko badakwiye gutegereza ubufasha buva kuri Leta, ko bo ubwabo bagomba kubanza kwishakamo ibisubizo bashora imari aho itari Leta ikaza ari umufatanyabikorwa wa kabiri. Ati “Mwumva iyo Nyakubahwa Perezida wa Repubulika agiye mu gace runaka abantu bamusaba ko abubakira hoteli. Ubundi ibi bigomba gukorwa namwe abikorera kuko biri mu bizatuma mwiteza imbere ndetse n’ako gace kagatera imbere, ariko kubera ko mutabikora ni yo mpamvu mubona Leta ibyikorera.”

Minisitiri w’intebe kandi yasabye abikorera gucika ku muco wo kumva ko gutera imbere ari ukujya mu mahanga gukora ubucuruzi, abasaba gushora imari hasi mu turere kuko hari byinshi batageraho kandi byabateza imbere.

Abayobozi b’uterere na bo bahawe impanuro ko bagomba kugirana imikoranire myiza n’abikorera bari mu turere twabo n’umuco wo kwambura ba rwiyemezamirimo ugacika burundu, basabwa icyakora kubikorana ubushishozi kuko hari ba rwiyemezamirimo badakora neza ibyo baba biyemeje cyangwa ntibanabirangize.