Abanyarwanda biga mu mahanga barasabwa kuba aba ambasaderi beza

Mu gihe kingana n’ibyumweru 2 Abanyarwanda biga mu mahanga bari bamaze Mu itorero ry’igihugu i Gako mu karere ka Bugesera, kuri uyu wa Gatandatu tariki 11 Kanama 2012 barisoje kumugaragaro aho basabwe kwihesha agaciro ndetse no kugahesha igihugu cyabo mu bihugu bitandukanye baturutsemo.

Minisitiri w’Ububanyi n’amahanga w’u Rwanda Louise Mushikiwabo wari umushyitsi mukuru muri uyu muhango, mu ijambo rye yavuze ko Minisiteri ayoboye ndetse n’izindi minisiteri zitandukanye, zitegura iki gikorwa ngaruka mwaka cyo gushyira aba banyarwanda biga mu mahanga mu itorero, mu rwego rwo kubagaragariza iterambere igihugu cyabo cyiba kimaze kugeraho ndetse no mu buryo bwo guhuza Abanyarwanda baba hanze yarwo n’abo mu Rwanda, kugira ngo bungurane ibitekerezo bityo biyubakire igihugu.

Louise Mushikiwabo kandi yasabye izo ntore gukomeza kubumbatira umuco nyarwanda aho biga hose, gusakaza indangaciro nyarwanda, gutanga umusanzu wabo bazana ubumenyi baba baragiye gushaka hanze kuko ngo igihugu cyiba kibatezeho byinshi.

Yamaze impungene abanyarwanda baba hanze kuko ngo n’iyo yaba ari umunyarwanda umwe, igihugu cye kigomba kumukurikiranira bugufi kikamenya uko afashwe, ariko abasaba ko nabo ku giti cyabo bagomba kubanza kwihesha agaciro kuko ntawaguha agaciro wowe utakihesheje.

Umukuru w’itorero ry’igihugu Rucagu Boniface, nawe yahaye impanuro izi ntore z’abanyeshuri kutazibagirwa impanuro baboneye muri iri torero, ahubwo bazikwirakwiza biga mu bihugu bitandukanye.
Yagize ati “mu bihugu bisaga 19 muturutsemo, ibi bivuze ko igihugu cyanyu gifitemo ba ambasaderi bagihagarariye, bityo iryo zina ry’igihugu cyanyu muzariheshe agaciro kandi namwe muzaba mukihesheje.”.

Mukandekezi Angelique watururutse mu guhugu cya Uganda, yatangarije IGIHE ko nyuma yo gusoza iri torero, avanyemo intego z’uko agiye gukomeza kugararagaza isura nziza y’u Rwanda mu gihugu aturutsemo kuko ngo akenshi wasangaga hakiri abantu bamwe bavuga amateka y’u Rwanda uko atari.

Yakomeje agira inama urubyiruko rugenzi rwe ko kugira ngo igihugu cyabo gitere imbere, bo ubwabo aribo bagomba kubigiramo uruhare kuko ngo icyo urubyiruko rwiyemeje ntacyarunanira.

Izi ntore zisoje itorero ry’igihugu ni 281, abasore 215 n’abakobwa 56. Uyu muhango witabiriwe n’abayobozi batandukanye barimo ab’ingabo, aba polisi ndetse n’abaturutse muri Komisiyo y’ubumwe n’ubwiyunge, iy’uburezi n’izindi.