Leta Zunze Ubumwe za Amerika yashyizeho igihembo cy’amafaranga ku muntu wese uzatanga amakuru ku bantu 6 bakurikiranyweho kugira uruhare muri Jenoside yakorewe Abatutsi mu 1994 kugeza ubu baburiwe irengero.
Aba baje biyongera kuri 3 basanzwe barashyiriweho ibyo bihembo barimo n’ushakishwa kurusha abandi ari we Kabuga Felicien. Buri umwe yashyiriweho miliyoni 5 z’Amadolari y’Amerika.
Stephen J. Rapp ushinzwe gukurikirana ababuriwe irengero muri USA avuga ko abashakishwa ari Pheneas Munyarugarama, Fulgence Kayishema, Charles Sikuwabo, Ladislaus Ntaganzwa, uwitwa Ryandikayo na Aloys Ndimbati.
Aganira n’abanyamakuru ubwo yagirira uruzinduko ruto ku kicaro cy’Urukiko Mpuzamahanga Mpanabyaha rwashyiriweho u Rwanda (ICTR) ruri Arusha, Rapp yagize ati : “Hazabaho guhembwa amafaranga n’ubwo atangana n’ayashyizwe kuri kabuga n’abandi babanje.”
Yongeyeho ko amadosiye y’aba 6 agomba kugezwa i Kigali vuba kuko ICTR izafunga imiryango yayo vuba.
Amadosiye ya Felicien Kabuga, Protais Mpiriranya na Augustin Bizimana yo azashyikirizwa Umushinjacyaha w’urwego ruzasimbura ICTR rwahawe izina rya Mechanism for International Criminal Tribunals (MICT).
Rapp na we wigize gukora muri uru rukiko rwa Arusha guhera mu 2001 kugeza 2007, yavuze ko gushyiraho amafaranga byagize uruhare runini mu gufata bamwe bamwe mu bashakishwaga aho bamwe ubu bakatiwe, abandi bakagirwa abere. Abenshi kandi bafatiwe mu karere k’ibiyaga bigari no mu Burasirazuba bwa Afurika ariko hari n’abafatiwe mu Burengerazuba bwa Afurika ndetse n’u Burayi.
Yasobanuye ko iki gihembo cy’amafaranga kizashimangirwa ku gaciro k’amakuru azaba yatanzwe ndetse n’ingaruka umuntu ashobora kugwamo mu gushaka amakuru. Hazanagenderwa kandi ku buremere ushakishwa akurikiranyweho.
Yavuze ko muri aba, ushakishwa kurusha abandi ari Munyarugarama kubera uruhare runini akurikiranyweho mu buhotozi yakoreye mu Rwanda ubwo yari afite ipeti rya Lieutenant Colonel akaba ari we wari umusirikare mukuru mu nkambi ya gisirikare ya Kigali.
Bivugwa ko yateguye akanashyira mu bikorwa uburyo bwo kwica Abatutsi mu duce dutandukanye mu mujyi wa Kigali.
Izindi dosiye zoherejwe mu Rwanda uretse iya Munyagishari na Munyarugarama zajuririwe bityo urukiko rukaba rutarafata ibyemezo bya nyuma bizohereza mu Rwanda.
Umushinjacyaha ushinzwe gukurikirana abakoze Jenoside yakorewe Abatutsi bihishe hanze y’u Rwanda, Siboyintore Jean Bosco atangaza ko bishimiye iki gikorwa kuko ngo ari inkunga ikomeye mu butabera.
Mu butumwa bugufi (SMS) yoherereje IGIHE, Siboyintore yagize ati : “Twishimiye iyo nkunga mu butabera, bigaragaza ko Amerika yahagurukiye guca umuco wo kudahana ishyiraho kiriya gihembo.”
Yakomeje asaba ababa bafite amakuru yerekeranye n’aho abo bavuzwe baba bihishe bagana Ubushinjacyaha bw’u Rwanda bakabaha amakuru bityo uzatanga amakuru afatika azatuma bafatwa bagashyikirizwa ubutabera azahabwa icyo gihembo.
Abagera kuri 92 bakurikiranyweho kugira uruhare runini muri Jenoside yakorewe Abatutsi aho amadosiye yabo ari mu rukiko rwa Arusha.
Kugeza umwaka ushize, abagera kuri 50 baciriwe imanza aho 42 bakatiwe naho 8 bagirwa abere, ariko 19 baracyaburanishwa kugeza ubu.
Ku ifoto hejuru : Stephen J. Rapp
IKINYARWANDA
IKIRUNDI
ENGLISH
FRANÇAIS
Ahabanza
Abo Turibo
Serivisi
Twandikire
Ibirimo
