IGIHE.com > Amakuru > U Rwanda
Abakozi ba Loni bakorera muri Sudani y’Amajyepfo mu mahugurwa mu Rwanda

Abakozi ba Loni bakorera muri Sudani y’Amajyepfo mu mahugurwa mu Rwanda


Yanditswe kuya 5-02-2013 - Saa 07:59' na Isaie Mbonyinshuti

Abakozi 20 bakorera Urwego rw’Umuryango w’Abibumbye rushinzwe kubungabunga amahoro muri Sudani y’Amajyepfo (UNMISS) batangiye amahugurwa i Nyakinama mu karere ka Musanze, ku bijyanye no kuvugurura inzego z’umutekano.

Aba bakozi biganjemo abenegihugu ba Sudani y’Amajyepfo, kuri uyu wa mbere tariki 04 Gashyantare 2013 batangiye guhabwa amasomo azamara ibyumweru bibiri, hagamijwe guha imbaraga urwego rw’umutekano nk’igihugu kicyiyubaka.

Brig. Gen. Jacques Nziza Umunyamabanga uhoraho muri Minisiteri y’ingabo z’Igihugu, yavuze ko u Rwanda rwishimira gutanga inkunga yarwo mu kwiyubaka kwa Sudani y’Amajyepfo, nk’igihugu kikiri gito kandi gisohotse mu mvururu.

Akomeza atangaza ko iterambere ry’urwego rw’umutekano, ari umusingi mu iterambere rya Demokarasi, imiyoborere myiza, ubutabera, kugendera ku mategeko ndetse n’iterambere rirambye.

Umuyobozi w’ikigo cy’Amahoro cy’u Rwanda (Rwanda Peace Academy) Col. Jules Rutaremara, yatangaje ko ayo mahugurwa yitabiriwe n’abantu 20 bagizwe n’abasirikare, abapolisi ndetse n’abasivile bakorera Umuryango w’Abibumbye, barimo Abanyasudani y’Amajyepfo 17 n’abandi 3, aho bategurirwa kuzakomeza inshingano igihe uwo muryango uzaba utakibarizwa muri icyo gihugu.

Aya mahugurwa yateguwe n’Urwego rw’Umuryango w’Abibumye rushinzwe kugarura amahoro muri Sudani y’Amajyepfo (UNMISS), ishami ry’Umuryango w’Abibumye rishinzwe amahugurwa n’ubushakashatsi (UNITAR) ndetse na Leta y’u Rwanda.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO