IGIHE.com > Amakuru > U Rwanda
Abakozi ba Leta baratangira guhembwa imishahara mishya muri Nyakanga

Abakozi ba Leta baratangira guhembwa imishahara mishya muri Nyakanga


Yanditswe kuya 17-01-2012 - Saa 06:57'

Imishahara mishya y’abakozi ba Leta bazatangira kuyifata muri Nyakanga usibye abarimu bazatangira kuyafata muri Mutarama 2012.

Mu kiganiro yagiranye n’abanyamakuru Minisitiri w’abakozi ba Leta n’umurimo Anastase Murekezi yavuze ko Inama y’Abaminisitiri yateranye kuya 13 Mutarama yemeje ko hongerwa imishahara ku bakozi ba Leta kugira ngo bakomeze kuyikorera batanga umusaruro ushimishije.

Yavuze ko ibi bizatangira gushyirwa mu bikorwa mu kwezi kwa Nyakanga usibye abarimu bafite impamyabumenyi ya A2 bazongererwa 10% by’umushahara wabo muri Mutarama 2012 nk’uko bigenwa na Politiki nshya y’imishahara y’abakozi ba Leta.

Abakozi ba Leta umushahara wabo uziyongera; usibye abakozi ba Leta basanzwe bafite umushahara uri hejuru, ni ukuvuga abakozi bakora mu bigo bya Leta basazwe bahemberwa kuri index value ya 400 na 500 bazaguma ku mushahara wabo; ariko bajye bazamuka mu ntera.

Guhembwa umushahara muto bituma abakozi bata akazi

Minisitiri Murekezi ati: "Iyo umusaruro w’igihugu uzamutse bivuze ko n’abakozi nabo bagomba kongererwa umushahara."

Yavuze ko kongera imishahara mishya bijyana n’umusaruro abakozi batanga mu kazi kabo, bitewe n’imihigo bahiga. Guhera muri 2006, agaciro k’umushahara kagiye kagabanyuka ku buryo kageze kuri 37% abakozi bagera kuri 16% bavuye ku mirimo yabo bitewe no guhabwa umushara muto, ibi bikaba byarateye icyugazi mu bakozi.

Ibigo bihemba neza nibyo bigira abakozi babirambamo

Minisitiri Murekezi yavuze ko impamvu ibigo bihemba neza abakozi babo baharamba biterwa n’uko abayobozi bibyo bigo bafata neza abakozi babo bigatuma abakozi nabo batajarajara hirya no hino bahindagura imirimo.

Kongera umushahara bijyana n’amikoro y’igihugu

Murekezi avuga ko kongera umushahara w’abakozi ba leta biterwa n’amikoro y’igihugu, iyo ubukungu bwiyongera n’umushahara uriyongera. Gukora neza nabyo biri mu bituma umukozi azamurwa mu ntera n’umushahara ukiyongera.

Abasirikare n’abarimu bazamuwe mu ntera nabo

Kuba imishahara itaragiye izamuka mu myaka 5 ishize byatewe n’amikoro make y’igihugu. Abarimu n’abasirikare nabo ntibibagiranywe kuko abarimu bazatangira guhembwa umushahara mushya muri uku kwezi kwa Mutarama mu gihe abandi bakozi ba leta bazatangira guhebwa umushahara mushya mu kwezi kwa karindwi.

Guhuza imishahara n’ubuzima bwo hanze biragoye

Minisitiri Murekezi yagize ati: "Guhuza imishahara n’ubuzima bwo hanze aha bwa buri munsi biragoye."

Yavuze ko bitewe n’ubwiyongere bw’ubukungu bw’igihugu umushahara ujyana nabwo.

Abarimu batarahembwa ibirarane bigera ku myaka 10

Minisitiri Murekezi avuga ko abarimu bafitiwe ibirarane by’imyaka irenga 10 bagiye kubyishyurwa kuko leta yize uburyo yakemura ikibazo cyabo.

Minisitiri w’abakozi ba Leta n’umurimo yavuze ko iki kibazo bakizi kandi bagiye kugikemura vuba aha ku buryo hari n’abatangiye kuyabona.

Yagize ati: "Muri uno mwaka hazabaho impinduka nini cyane ku bijyanye n’imibereho myiza ya mwarimu."

Mu mwaka wa 2006 habayeho ubusumbane mu mishahara
Mu mirongo ngenderwaho igena imishahara y’abakozi ba leta mu mwaka wa 2006 yagaragaje ko habayeho ubusumbane mu mishahara hagati y’Abakozi ba za Minisiteri n’ab’ibigo bya Leta; Umubare mu nini w’abakozi ba Leta badatinda mu kazi ka Leta(high turnover) mu butegetsi bwite bwa Leta no mu Nzego z’ibanze; kutiyongera kw’imishahara ( pay stagnation) y’abakozi ba leta mu myaka itandatu ishize.

Politiki shya y’imishahara no gucunga abakozi ba Leta

Minisitiri Murekezi avuga ko muri Politiki shya y’imishahara no gucunga abakozi ba Leta kugira ngo bakomeze kuyikorera batanga umusaruro ushimishije; harimo kuringaniza imishahara ku bakozi bakora akazi kangana; gushyiraho uburyo bunoze kandi buciye mu mucyo bwo gushyiraho no gucunga imishahara n’ibindi bihembo; kugena imishahara ku bakozi ba Leta mu bushobozi bw’ubukungu bw’igihugu; gushimira abakozi ba Leta b’indashyikirwa.

Mu gihe cy’imyaka itandatu iri mbere uhereye muri uyu mwaka w’ingengo y’imari mwa 2011/2012 kugeza mu mwaka w’ingengo y’imari wa 2016/2017, imishahara y’abakozi ba Leta izagenda yiyongera.

Leta y’u Rwanda yaherukaga kongera imishahara y’abakozi mu mwaka wa 2005.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO