IGIHE.com > Amakuru > U Rwanda
Abakobwa barasabwa kwirinda uwahungabanya icyerekezo cyabo

Abakobwa barasabwa kwirinda uwahungabanya icyerekezo cyabo


Yanditswe kuya 8-03-2013 - Saa 20:46' na Isaie Mbonyinshuti

Abana b’abakobwa basabwa kwizera ko bashoboye kandi bishoboye, bagahindura imyifatire birinda uwo ari we wese wahungabanya icyerekezo bihaye, barushaho kwigira kuko Leta y’u Rwanda yabahaye amahirwe angana n’ay’abahungu.

Ubwo hizihizwaga umunsi mpuzamahanga w’umugore wabereye mu karere ka Musanze, kuri uyu wa gatanu tariki 08 Werurwe 2013, Madamu Jeannette Kagame Umufasha wa Perezida wa Repubulika yasabye abakobwa gukoresha amahirwe Leta y’u Rwanda yabahaye yo kungana na basaza babo, bakarushaho kwigira. Bakizera ko bashoboye kandi bishoboye, bagahindura imyumvire birinda uwo ari we wese wahungabanya icyerekezo bihaye.

Jeannette Kagame yagize ati “tumaze kumenyera ko uku kwezi gutangizwa n’icyumweru cyahariwe uburezi bw’umukobwa. Tumushishikariza kwigirira icyizere, akiga amashami yose n’ibyiciro byose, kandi akaba indashyikirwa. Ni muri urwo rwego nagira ngo twongere dushimire abakobwa bose batsinze neza twita ‘Inkubito z’Icyeza.”

Jeannette Kagame yasabye ababyeyi kugarura umuco wo kurerera abana mu miryango, kuko ubu hari ibigo byamaze gufungwa, nka Centre Girimpuhwe Remera na Mpore-Pefa mu Karere ka Kicukiro na Cite de la Misericorde mu Karere ka Huye. Aho bitarafungwa ababyeyi batangiye kwitabira gahunda yo kwakira abana.

Jeannette Kagame yakirana abana urugwiro

Abita ku mfubyi barashimwa

Yakomeje ashimira ababyeyi “Malayika Murinzi” bakomeje kugira umutima wa kibyeyi, wo kwakira abana batagira kivurira no guha imiryango abarererwaga mu bigo by’imfubyi. Aboneraho no gushimira abantu bakomeje gufatanya na Leta y’u Rwanda gushyira mu bikorwa politiki yo guteza imbere uburezi bw’umukobwa, cyane cyane One UN Family n’abayifasha muri politiki yo gusubiza abana mu miryango.

Abo babyeyi bose ngo bakiriye abana bashobora kwibumbira mu “Ihuriro rya ba Malayika Murinzi”, bamwe mu bahawe ishimwe uyu munsi, harimo batanu bakiriye mu miryango yabo abana b’impfubyi babaga mu kigo cya Orphelinat Noel cyo ku Nyundo, babikanguriwe na Komisiyo y’Igihugu yita ku Bana ku bufatanye bw’Ubuyobozi bw’Akarere ka Rubavu n’Umuryango Unity Club.

Jeannette Kagame yashimiye cyane Ihuriro ry’Abagore bari mu Nteko Ishingamategeko y’u Rwanda (FFRP) bashyikirije Unity Club inka 5
zahawe abo babyeyi, anasaba bagenzi be bo muri Unity Club kumufasha gushimira ababigizemo uruhare, kandi bazakomeza no gufatanya mu kubagira inama ngo zizabageze ku musaruro ushimishije.

Yagize ati “Dukomeze duhuze imbaraga twite cyane cyane ku gukumira ko abana bakomeza kujyanwa mu bigo by’imfubyi. Imiryango ikangurirwe gusubirana umuco wo kurerera umuvandimwe cyangwa incuti igihe batabarutse.”

Jeannette Kagame yagarutse ku kwezi kwahariwe umugore n’umukobwa, binyujijwe mu nsanganyamatsiko igira iti “Uburinganire n’ Ubwuzuzanye bihesha Agaciro Umuryango”, ko ishimangira intego u Rwanda rwihaye muri uyu mwaka yo “ Kwigira”. Agira ati “Imiryango imaze gusobanukirwa “kwigira” icyo ari cyo, haba ubwuzuzanye hagati y’umugabo, umugore ndetse n’abana. Ubwo bwuzuzanye bwashimangira ihame ry’uburinganire, buganisha ku guhesha agaciro umuryango ndetse n’igihugu cyacu.”

Madame Jeannette Kagame yashishikarije abagore kwibumbira mu makoperative ndetse no kugana ibigo by’imari, nk’uburyo bwo kwikura mu bukene no kugera ku iterambere rirambye mu buryo bwihuse.

Umugoroba w’ababyeyi ugirwe umuco

Yongeye kubasaba ko bagomba kugira umugoroba w’ababyeyi umuco, kuko byagaragaye ko iki gikora gifitiye akamaro kanini umuryango, bitewe n’uko basasa inzobe bagashakira umuti ibibazo bitandukanye.
Yagize ati “Umugoroba w’ababyeyi nugirwe umuco nk’uko gukora umuganda ubu bimaze kuba umuco wacu, bizagere aho bibyara umugobora w’umuryango, aho ababyeyi n’abana bahura bakaganira no ku iterambere ryabo.”

Kuva mu mwaka wa 2005 kugeza ubu hamaze guhembwa inkubito z’icyeza zigera ku 3466, hakaba hamaze no kujyaho ihuriro rya ba Malayika Murinzi mu turere 27, ayo mahuriro akazifashishwa muri gahunda yo gusubiza abana mu muryango.

Kuri uyu munsi kandi Madamu Jeannette Kagame yatangije ku mugaragaro ukwezi kwahariwe umugore n’umukobwa n’umugoroba w’ababyeyi, kuzakorwamo ibikorwa birimo kwita ku burezi bw’umwana w’umukobwa, guteza imbere umugore mu bukungu no kwita ku mibereho n’imiyoborere myiza n’ubutabera.

Jeannette Kagame ageza ijambo ku bitabiriye kwizihiza ibirori by'umunsi w'umugore n'umukobwa
Jeannette Kagame ahemba abana b'abakobwa batsinze neza amasomo
Ibirori byo kwizihiza umunsi w'umugore n'umukobwa byitabiriwe na benshi. Abagore batanze ibitekerezo.
Bimwe mu bihembo byahawe abana b'abakobwa batsinze neza amasomo.
Amashyirahamwe y'abagore yitabiriye kwizihiza umunsi w'umugore n'umukobwa
Umwana akwiye kugaragarizwa urukundo na buri wese.
Mu mikino ngororamubiri abagore n'abakobwa ntibasigaye inyuma.
Ishyirahamwe ry'abagore bacuruza ibikomoka ku buhinzi ryahaserukanye umucyo.
Abayisilamukazi bahaserukanye umucyo.
Si ukubyina gusa, bari bishimiye n'umunsi w'umugore n'umukobwa
Abasore na bo ntibatanzwe mu birori by'umunsi w'umugore n'umukobwa.
Ibyishimo byari byose kuri uyu munsi
Abana b'abakobwa batsinze neza amasomo mu bihembo bahawe harimo na mudasobwa.
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO