Abagore bakomeje gufata umwanya wa mbere mu gucuruza ibiyobyabwenge – Polisi

Umuyobozi mukuru w’Ishami rishinzwe kurwanya ibiyobyabwenge muri Polisi y’igihugu Supt. Emmanuel Ngondo, aravuga ko abagore bakomeje kwigaragaza cyane muri bamwe mu bakora ubucuruzi bw’ibiyobyabwenge mu Rwanda.

Impamvu nyamakuru igaragazwa n’uru rwego rwa Polisi y’igihugu ituma ngo abagore bakunze kurangwa muri ibi biyobyabwenge, harimo ngo kuba babishyira ku mibiri yabo ndetse ugasanga bambara imyenda minini mu rwego rwo guhisha ko hari icyo batwaye.

Ubundi buryo Polisi y’igihugu ivuga ko bukoreshwa n’abacuruza ibi biyobwabwenge, burimo nko ku bihisha mu mu mabido ndetse no ku bishyira mu mu mifuka ya sima kubryo ngo wakeka ko nta bindi bintu birimo.

Icyegeranyo cya Polisi y’igihugu cyo mu mwaka wa 2011, cyerekana ko abagore bagera kuri 261 batawe muri yombi bacuruza ikiyobyabwenge cya Cannabis n’aho abagera ku 183 batabwa muri yombi bazira gucuruza ikiyobyabwenge cya Kanyanga.

Amakuru dukesha The New Times aravuga ko muri uyu mwaka wa 2012, abagore bagera ku 165, bamaze gutabwa muri yombi bazira gucuruza ikiyobyabwenge cya Cannabis n’aho 106 bakaba baratawe muri yombi bacuruza ikiyobyabwenge cya Kanyanga.

Supt. Emmanuel Ngondo yakomeje avuga ko ibiyobwabwenge byinjira mu Rwanda, usanga bituruka mu bihugu bya Tanzaniya ndetse na Repubulika Iharanira Demokarasi ya Congo.

Umukuru wa Polisi y’Igihugu Emmanuel Gasana, arasaba abaturage gukomeza gutanga amakuru mu rwego rwo guhashya ibi biyobyabwenge dore ko ngo na Polisi y’Igihugu iticaye ubusa aho ngo ikomeje gutanga inama hirya no hino mu gihugu no mushuri mu rwego rwo gukomeza kubumbatira umutekano akenshi waginzwa n’abanywa ibi biyobyabwenge.

Bumwe ngo mu buryo Polisi y’Igihugu yifashisha mu guhangana n’aba babicuruza, birimo, gukoresha imbwa zitahura ababifite, ndetse no gukaza gusaka ibi biyobyabwenge kuri bariyeri zitandukanye.

Ingingo ya 594 y’amategeko ahana y’u Rwanda, ivuga ko umuntu wese bigaragayeho gukoresha ibiyobyabwenge ndetse no ku bicuruza, ahanishwa igifungo kiri hagati y’umwaka umwe ndetse n’itatu kandi agahanishwa gutanga amafaranga ari hagati y’ibihumbi 50 n’ibihumbi 500.