IGIHE.com > Amakuru > U Rwanda
Abadepite barifuza ko ibiciro binyunyuza abaturage ku irimbi rya Rusororo bihindurwa

Abadepite barifuza ko ibiciro binyunyuza abaturage ku irimbi rya Rusororo bihindurwa


Yanditswe kuya 11-02-2013 - Saa 13:14' na René Anthère Rwanyange

Ubucukumbuzi bwakoze na Komisiyo y’imibereho myiza mu Nteko Ishinga Amategeko y’u Rwanda ku birebana n’ikiguzi cy’imva mu irimbi rya Rusororo, bugaragaza ko icyo kiguzi gikwiye kumanurwa kuko kiri hejuru cyane.

Umuyobozi w’iyi Komisiyo Mwiza Esperance, atangaza ko nyuma y’ubushakashatsi bwakozwe hafashwe icyemezo ko ikiguzi cyo gushyingura mu irimbi rya Rusororo cyagabanywa kuko kiri hejuryu cyane ugereranyije n’ubushobozi bw’Abanyarwanda basanzwe.

Depite Mwiza yabwiye ikinyamakuru Rwanda Today dukesha iyi nkuru, ati “Iyi raporo tuzayigeza ku Nteko Ishinga Amategeko n’ibyifuzo twatanze kuko twamaze kuyikorera ubugororangingo. Icy’ingenzi mu byo tuzunguranaho ibitekerezo ni ukureba uburyo ikiguzi cy’imva cyagabanywa kandi ku buryo bwihuse.” Yakomeje avuga ko komisiyo izasaba Ikigo cy’Igihugu gishinzwe kubungabunga ibidukikije (REMA) gukora inyigo y’ikiguzi nyacyo.

Ubu irimbi rya Rusororo ricungwa na Gasabo Funeral Services, ku masezerano y’imyaka itanu bagiranye n’Akarere ka Gasabo, buri wese agahitamo aho ashyingura uwe bitewe n’ubushobozi afite.

Rwamamara Desire, Umuyobozi wa Gasabo Funeral Services, avuga ko imva zo mu rwego rwiyubashye zishyurwa amafaranga ibihumbi 750, ariko hajyaho n’imirimo yo gushyingura bikaba byagera kuri miliyoni eshanu.

Urwego rukurikiyeho rwo mu cyiciro cyo hagati rurimo ibyiciro bitatu, imva ikaba yishurwa hagati y’ibihumbi 600 na 200 mu gihe isanzwe ishobora kwishyurwa amafaranga ibihumbi ijana.

Urwego rwa nyuma rwo hasi ku baturage basanzwe, imva yishurwa amafaranga 150,000.

Rwanda Today cyanditse ko ikiguzi cy’imva cyazamutse guhera mu kwezi kwa Gicurasi umwaka ushize, abadepite bakaba basaba ko Umunyamabanga wa Leta muri Minisiteri y’Ubutegetsi bw’Igihugu ushinzwe imibereho myiza gutanga ibisobanuro kuri iki kibazo.

Mugabo Janvier utuye i Kabuga mu Karere ka Gasabo akaba yarahoze ari umwe mu bakozi bo mu irimbi ry’i Remera, yatangarije Rwanda Today ko igiciro cy’imva mu irimbi rya Rusororo kiri hejuru cyane ugereranyije n’icyakwaga mu irimbi ry’i Remera ritarafungwa. Ati “Ibiciro biri hejuru cyane ugereranyije n’ibihe turimo. Hari imiryango ihangayikishwa no kubona ayo mafaranga ajyana n’ishyingura. Byaba byiza Guverinoma idufashije ibiciro bikagabanuka.”

Yumvikanisha ko mu bihe byashize igiciro rusange cyari ugereranyije n’ubu, ati “Mu irimbi ry’i Remera umuturage yahitagamo abo agura na bo kuko abatangaga izo serivisi bari benshi. I Rusororo rero Gasabo Funeral services ni yo ihakorera yonyine. Yihariye isoko. Nta muntu ufite uburenganzira bwo guhitamo uwo yakorana na we.”

Depite Mwiza avuga ko ari inshingano za Guverinoma kurengera abaturage kuri ibyo biciro bihenze. Ati Twavuganye n’abarebwan’iki kibazo bose barimo akarere, abacunga irimbi n’abandi bireba. Twakiriye ibitekerezo bya buri wese ariko inshingano zacu ni ukurengera inyungu z’abo duhagarariye.”

Ku bijyanye n’ibiciro ariko ubuyobozi bwa Gasabo Funeral Services buvuga ko igiciro cy’imva kijyanye na serivisi ziba zatanzwe.

Mu gihe hari ibihuha ko Gasabo Funeral Services yaba yarahagaritswe ku micungire y’irimbi rya Rusororo, Mpyisi Gerard, umwe mu banyamigabane bayo yatangarije Rwanda Today ko atari byo ; kandi ko bari mu biganiro n’inzego zinyuranye ku birebana n’ibiciro bijyanye na serivisi batanga.

Umuyobozi w’iri rimbi rya Rusororo ariko avuga ko ikiguzi atari icyo bahimbye, kuko ngo babanje kubyigaho neza bagendeye no no ku zindi serivisi batanga zijyanye no gushyingura. Avuga ko ibyo bakora ntaho bihuriye n’ibyakorerwaga i Remera, kuko abaza gushyingura i Rusororo basanga ibintu byose biteguye neza kandi ngo nta wuravuga ko bimubangamiye.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO