IGIHE.com > Amakuru > U Rwanda
Uburiganya mu bizamini bya 2012 bisoza amashuri yisumbuye

Uburiganya mu bizamini bya 2012 bisoza amashuri yisumbuye


Yanditswe kuya 20-02-2013 - Saa 16:12' na Marie Chantal Nyirabera

Ikigo cy’uburezi mu Rwanda REB, kiratangaza ko abantu 574 bakoze ibizamini bya leta bissoza umwaka w’amashuri wa 2012 mu buryo butemewe nyuma yo kwakirwa n’amashuri yigenga bagahabwa imyanya ibemerera gukora ibizamini bakanahabwa imyambaro y’ishuri n’amakarita y’ishuri bitanyuze mu mategeko.

Urupapuro rugaragaza amwe mu mashuri yagaragaweho n'amakosa yo kwandika abakora ibizamini mu buryo butemewe

Muvunyi Emmanuel, Umuyobozi wungirije wa REB ushinzwe ikosorwa ry’ibizamini, yadutangarije ko abayobozi b’amashuri ya GS APERWA, Kabuga High School, Solidarity Academy, Nyamata High school, Collede de Bethel, Gasabo High School na ESSA Nyarugunga bakiriye abantu baza gukora ibizamini bya leta batari basanzwe ari abanyeshuri.

Muvunyi avuga ko mu gihe cy’ibizamini hari abazaga kubikora bambaye nk’ababikira cyangwa abayisilamu b’abagore bahisha imisatsi yabo itari imeze nk’iy’abanyeshuri, iki kikaba ari kimwe mu byatumye hibazwa ibibazo byinshi.

Ikindi cyabigaragaje ni uko umwe muri bo yafashwe adafite ikarita y’ishuri, ndetse n’abanyeshuri bo kuri ibi bigo bakagaragaza ko batunguwe no kubona amasura mashya yambaye imyambaro nk’iyabo. Abarimu na bo ngo barabibonye bibatera impungenge bahitamo kubivuga.

Kuba ibintu nk’ibi byarabaye ngo byatewe n’uko bamwe mu bayobozi b’abmashuri yigenga bakira ruswa bagatanga imyanya mu buryo butemewe ku bantu batize ngo bakurikire integanyigisho yateganyijwe.

Ibi umuyobozi wungirije wa REB avuga ko bigira ingaruka ku ireme ry’uburezi, bikica amategeko n’amabwiriza ya Leta n’umuco wa ruswa utemewe ukarushaho gukwira.

Umuyobozi ushinzwe ibizamini muri REB avuga ko abakoze aya makosa amategeko abateganyiriza ibihano

Ibi byaha byose ariko bihanwa n’amategeko, ndetse ubu bamwe mu babikoze ngo barabyemeye nubwo hari ababuriwe irengero abandi bakava ku mirimo.

REB itangaza ko ababigizemo uruhare n’ubufatanyacyaha bazakurikiranwa n’amategeko.

Babiri mu bakoze ibizamini ni abo mu ishuri rya Gabiro High School na ESSA Nyarugunga twasanze kuri REB badutangarije ko bafite impungenge zo kuba bibuze ku ma lisiti y’abakoze, nubwo ngo amashuri yari yabakiriye yari yabasabye kwiga iminsi yose mu gihe cy’umwaka wa nyuma bakanishyura amafaranga y’ishuri nk’abandi.

Gusa bo bavuga ko bumva batakagombye guhanwa, ko niba ibyo bakoze ari amakosa hahanwa abayobozi b’amashuri yabakiriye kuko bo batari bazi ko bibujijwe.

Aba bakoze ibizamini batabyemerewe ngo biyandikishije batanze amafaranga ibihumbi 70, mu gihe abanyeshuri bo mu mashuri batanga ibihumbi bitatu gusa naho abakandida bigenga bujuje ibisabwa bakiyandikisha ku bihumbi 15.

Andi makosa agaragara muri ibi ni uko hari n’abakora batarize, abandi bagasimbuka imyaka mu gihe hari n’ababeshya abayobozi b’amashuri bakabaha indangamanota mpimbano.

Mu bizamini bisoza amashuri yisumbuye bya 2012 hanagaragayemo ibigo byakopeye birimo ESI Nyarubuye mu Karere ka Kirehe mu Ntara y’Iburasirazuba ahakopeye 33, APRED Ngenda ryo mu Karere ka Bugesera hakopeye 53 na ESI Kidaho.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO