IGIHE.com > Amakuru > U Rwanda
2012: Abanyarwanda icyenda bagurishijwe hanze y’u Rwanda

2012: Abanyarwanda icyenda bagurishijwe hanze y’u Rwanda


Yanditswe kuya 2-02-2013 - Saa 18:37' na IZUBA RIRASHE

Abantu nibura icyenda biganjemo ab’igitsina gore, ni bo bamenyekanye ko bajyanywe hanze y’u Rwanda gucuruzwa. Polisi y’igihugu ivuga ko hafi ya bose bagenda bumvikanye n’ababajyanye, nyamara babeshywe ko bagiye guhabwa imirimo myiza.

Aba bakobwa ngo bari mu kigero cy’imyaka 20, akenshi bakoreshwa mu tubari tw’i Burayi na Aziya bakinjiza amafaranga binyuze mu busambanyi.
Umwaka ushize hamenyekanye abakobwa icyenda bashukashutswe bizezwa imibereho myiza irimo kubona amashuri n’akazi, ariko bakisanga bagiye gukoreshwa uburaya abandi na bo bagakurwaho ibice by’umubiri birimo impyiko n’amaso.

Polisi y’u Rwanda ivuga ko iki cyaha kidakabije mu Rwanda ariko ikavuga ko gihangayikishije cyane ku buryo hashyizweho ingamba zo kurinda urubyiruko rw’u Rwanda kwisanga muri ubu bucuruzi.

Umuvugizi wa Polisi y’u Rwanda Supt. Badege Theos, ati “Iyo urebye imibare wakwibwira ko bidakabije ariko iki cyahakirakomeye cyane. Kigira ingaruka ku buzima bw’umuntu kandi kigahutaza imibereho y’igihugu.

Twashyize imbaraga mu gukangurira Abanyarwanda kumenyesha Polisi mu gihe cyose hari abantu babizeza ibitangaza hanze y’igihugu, ubu turabasaba ko bajya babimenyesha Polisi ndetse na Ambasade ku buryo n’aho umuntu yaba agiye hanze y’igihugu atagiye gucuruzwa aba azwi n’inzego z’igihugu ku buryo yakwitabwaho bibaye ngombwa.”

Polisi ivuga ko icyaha cyo gucuruza abantu ari uburyo bushya bw’ubucakara, aho umuntu akoreshwa imirimo y’agahato kandi iyo ageze aho agiye gukorera yamburwa ibyangombwa byose ku buryo adashobora gutembera.

Inzego z’umutekano zirinda kugaragaza amazina y’abajyanywe gucuruzwa n’ibihugu bajyanywemo. Amakuru avuga ko ibihugu bya Afurika y’Epfo, Tanzania, Uganda na Malaysia, u Bushinwa na bimwe mu bihugu by’i Burayi ari ho Abanyarwanda bajyanwa muri ubwo buryo.

Ku ya gatandatu Nzeli 2012, umukobwa w’imyaka 22 yagaruwe mu Rwanda avanywe mu gihugu cya Malaysia aho yakoreshwaga ubusambanyi. Ubwo twandikaga iyi nkuru twamenye ko uyu mukobwa ubu ashobora kuba yarongeye kujya hanze y’igihugu, akaba ngo yaba akoresha urupapuro rw’inzira rwa Uganda.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO