Mu gihe habura amasaha 24, umutwe wa M23 wahakanye kuva muri Goma

Mu gihe habura amasaha 24, umutwe wa M23 wahakanye kuva muri Goma


Yanditswe kuya 26-11-2012 - Saa 08:37' na Olivier Muhirwa

Mu gihe Umuryango w’Abibumbye, abakuru b’ibihugu byo mu Karere k’Ibiyaga Bigari n’Umuryango wa Afurika Yunze Ubumwe basaba ko umutwe wa M23 wava mu Murwa Mukuru w’Intara ya Kivu y’Amajyaruguru ya Congo Kinshasa Goma bitarenze iminsi ibiri, uyu mutwe wahakanye uratsemba ko utiteguye gusiga abaturage b’i Goma.

Mu kiganiro Umuvugizi w’uyu mutwe Lt Col Kazarama Vianney yahaye Radio Ijwi rya Amerika mu gitondo cyo kuri uyu wa 26 Ugushyingo 2012, yavuze ko batarwanye kugira ngo baze i Goma, ahubwo ko barwanye mu kwirwanaho kuko Leta ya Congo yashakaga kubica no kubamaraho kandi bari bafitanye amasezerano bagiranye na yo mu mwaka wa 2009 ariko ntiyabyubahiriza.

Kazarama yagize ati “I Goma twarahahoze ni ho tuvuka kandi twahoze n’i Bukavu, ariko ntabwo twafashe imbunda ngo turwane kugira ngo dufate imijyi ; twe turwanira kugira ngo tubeho twe gushira(…). Kuva i Goma si byo kibazo. Niba Loni isaba ngo tuve i Goma, Loni nzi ko itashobora no kurira uyu mujyi. Uyu mujyi turawusigira ba nde ? Niba Loni ishoboye kuwurinda nitubwire, ko mbona bigendera mu bifaru bagendera mu ndege (….). None uyu mujyi wawusigira nde, umujyi urimo miliyoni y’abaturage ?”

Kazarama avuga ko bizeye ko abaperezida bo mu Karere barimo Kagame w’u Rwanda, uwa Uganda Kaguta Yoweli Museveni n’abandi ari abaperezida bafite ubwenge kandi M23 ikaba izi neza ko ibibazo bazabikemura.

Kazarama avuga ko bakireba neza koko niba ibyo abo baperezida bavuze byashobora kuzana umutekano n’amahoro, no kubaha ndetse no kugarura ishusho ya Congo. Aha ariko M23 ishimangira ko nta bushake Leta ya Congo igaragaza mu gukemura ibibazo ifitanye na M23, Kazarama we akavuga ko itazi ibyo ikora.

M23 iremeza imishyikirano Congo ikayihakana

Mu gihe M23 ivuga ko Perezida wayo yagiye i Kampala kuganira na Perezida Kabila, Umuvugizi wa Leta ya Congo Lambert Mende we arahakana yivuye inyuma ko nta mishyikirano Perezida Kabila yagiranye na M23, ahubwo akavuga ko icyabaye ari uko Perezida Kabila yasuhuje intumwa za M23 kubera icyubahiro kuko yari abisabwe na Perezida Museveni ngo azisuhuze. Gusa M23 ishimangira ko ishaka imishyikirano igashaka amahoro mu Karere, ko idashaka ubutegetsi.

Mu nama yarangiye ku wa gatandatu yiga ku kibazo cy’intambara irimo kubera mu Burasirazuba bwa Congo, abakuru b’ibihugu bigize Akarere k’Ibiyaga Bigari bemeranyije ko mu masaha atarenze 48 ingabo za M23 zigomba kuba zavuye mu mujyi wa Goma.

Mu itangazo aba bayobozi bashyize ahagaragara basoza iyi nama, bavuze ko ingabo za M23 zava mu mujyi wa Goma zikajya mu bilometero 20 kandi ngo ibi bigakorwa bitarenze iminsi ibiri.

Umva uko Umuvugizi wa M23 yabivuze :

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO