Mgr Desmond Tutu arasaba ko George Bush na Tony Blair bashyikirizwa ubutabera

Mgr Desmond Tutu arasaba ko George Bush na Tony Blair bashyikirizwa ubutabera


Yanditswe kuya 2-09-2012 - Saa 06:21'

Archbishop Desmond Tutu wigeze guhabwa igihembo cy’amahoro kitiriwe Nobel, yatangaje kuri uyu wa 2 Nzeri ko Tony Blair na George Bush bagomba kugezwa imbere y’Urukinko Mpuzamahanga Mpanabyaha kubera ibyaha by’intambara bakoreye muri Iraq mu kuvanaho Sadam Hussein mu mwaka wa 2003.

Amakuru dukesha ikinyamakuru The guardian cyo mu Bwongereza, Desmon Tutu yashinje aba bagabo bayoboye ibi bihugu by’ibihanganjye ku isi ko bakoresheje intwaro z’ubumara muri Iraq ndetse ngo no kuba kugeza ubu isi ari bwo ifite umutekano muke kuva yabaho kandi ngo bigizwemo uruhare n’aba bagabo bombi.

Desmond Tutu yakomeje avuga ko kuba aba bagabo baragabye ibitero muri Iraq mu mwaka wa 2003, ari byo kugeza ubu bikigira ingaruka mbi mu Burasirazuba bwo hagati nko muri Syria ndetse no mu Burasirazuba bwo hagati muri rusange.

Mgr Tutu yagize ati iyo urebye usanga uru Rukiko rukatira imanza Abanyafurika gusa ugasanga ngo ari bo bonyine bakoze ibyaha by’intambara nyamara wajya kureba ugasanga hari abo uru rukiko rutareba ariko ngo igihe cyikaba cyigeze ngo Tony Blair na George Bush babazwe ibyo bakoreye muri Iraq.

Desmond Tutu agira ati “Niba Tony Blair na Bush barabeshye amahanga ko bateye Iraq kubera intwaro za kirumbuzi, nyamara bikagaragara ko ntazo Saddam Hussen yari afite, ubwo murumva batarabeshye isi? Ibi bikomeje bitya ababyeyi bakajya bababeshya, bivuze ko ntamurage mwiza baba batanga.”

Nyuma yo kumva ibyo ashinjwa, Tony Blair yanyomoje ibyo Tutu amushinja avuga ko kugeza ubu Iraq itunganye kurusha ku butegetsi bwa Saddam Hussein.

Tony Blair yagize ati “Njye rwose nubaha Desmond Tutu kubera ibikorwa byiza yakoze byo kurwanya ivanguramoko muri Afurika y’Epfo. Ariko ibyo yavuze rwose njye ndabifata nk’ibinyoma byambaye ubusa kuko twe ntabwo twabeshye amahanga ahubwo twarengeraga abantu bari bakomeje kwicwa na Saddam Hussein kandi akoresheje ibitwaro by’ubumara.”

Tony Blair yakomeje avuga ko mu gihe Saddam Hussein yari ku butegetsi, ngo yishe abantu batagira ingano, atanga urugero rw’ahantu hitwa Halabja aho kugeza ubu hashyinguwe umubare w’abantu benshi bishwe hakoreshejwe intwaro z’ubumara.

Tony blair yavuze ko kugeza ubu Iraq ifite ubukungu bumaze kwikuba hafi 3 ugereranyije no ku butegetsi bwa Saddam Hussein.

Desmond Tutu yahawe igihembo kitiriwe Nobel mu mwaka w’1984 nyuma yo gushimirwa uruhare yagize mu kurwanya ivanguramoko ryakorerwaga muri Afurika y’Epfo rikorerwa Abirabura rikozwe n’u Bwongereza.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO