Ku mipaka  y’u Rwanda na Congo hagiye gushyirwa ingabo

Ku mipaka y’u Rwanda na Congo hagiye gushyirwa ingabo


Yanditswe kuya 13-07-2012 - Saa 11:08' na Abdou Nyampeta

Mu nama yabereye mu gihugu cya Ethiopia ihuje ibihugu bigera kuri 11 byo mu Karere, hafashwe icyemezo cyo gushyira ku mipaka y’ibyo bihugu byombi u Rwanda na Congo ingabo zidafite aho zibogamiye.

Iyo nama yabaye kuri uyu wa Kane tariki ya 12 Nyakanga 2012, ikabera Murwa Mukuru wa Ethiopiya i Adis-Abeba yahuje ibihugu 11 bigize Inama Mpuzamahanga y’Ibiguhu byo mu Karere k’Ibiyaga Bigari mu rwego rwa Komite y’abahagarariye bihoraho Umuryango w’Ubumwe bwa AfuriKa COREP (Comité des représentants permanents de l’Union africaine).

Ku murongo w’ibyigwa hari ukureba uburyo hahoshwa amakimbirane ari hagati y’u Rwanda na Congo Kinshasa. Muri iyo nama hafashwe icyemezo cyo guhshyira ku mipaka y’ibyo bihuigu byombi ingabo zidafite aho zibogamiye.

Amakuru dukesha Radiyo Mpuzamahanga y’Abafaransa RFI (Radio France Internationale), ba Minisitiri b’ububanyi n’amahanga b’u Rwanda na Congo bari bafite ibyo bagomba kumvikanaho. Abagaba bakuru b’ingabo bagomba guhura kugira ngo barebe uko hashyirwaho uwo mutwe w’ingabo zidafite aho zibogamiye.

Mushikiwabo Louise, Minisitiri w’Ububanyi n’Amahanga w’u Rwanda avuga ko raporo ya Loni irimo ibirego birega u Rwanda ko rushyigikira bamwe mu barwanyi bo muri Congo ariyo kwitondera. Akomeza agira ati : ’’Loni imaze imyaka 13 yose muri Congo, ariko ntabwo irashobora gushyira ibintu mu buryo mu rwego rwo kugarura umutekano. Ifite ingufu nyinshi mu rwego rwo kubungabunga umutekano ku Isi yose, kandi buri mwaka ikoresha ama miliyari menshi y’amadolari. Sinumva ukuntu itagera ku nshingano yahawe’’.

Raymond Tshibanda, Minisitiri w’Ububanyi n’Amahanga wa Congo Kinshasa, we agira ati : ’’Ingabo za Loni (MONUSCO) zirahari. Ariko kuba zihari ntibivuga ko hagomba guhezwa ubundi buryo bwo kugenzura no kurinda umupaka no kurwanya abarwanyi b’imitwe nka FDLR na M23. Gushyiraho ingabo mpuzamahanga zidafite aho zibogamiye zigenzura zikarinda umupaka, n’ intambwe nziza yo kujya mbere’’.

Twabamenyesha ko iyo nama yateranye ku gitekerezo cy’igihugu cya Uganda.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO