Gutanga ibihembo bya Kora Awards 2012 byabaye ikimwaro

Gutanga ibihembo bya Kora Awards 2012 byabaye ikimwaro


Yanditswe kuya 31-12-2012 - Saa 14:48' na Richard Irakoze

Umuhango wo gutanga ibihembo Kora Awards mu Mujyi wa Abidjan, muri Côte d’Ivoire wabaye kuri iki Cyumweru tariki ya 30 Ukuboza 2012 wabaye agahomamunwa.

Ibi byateje ikimwaro gikomeye ku babiteguye, bari bagaragaje ko bikomeye cyane, by’umwihariko ugendeye ku mafaranga bari bishyuje mu kwinjira, ndetse n’amafaranga atagira ingano batanze yakoreshejwe mu kubitegura, gusa nyuma ntibyitabiriwe, yewe no kwinjira muri ikigiraramo ku buntu abahakandagiye bari mbarwa.

Ku ikubitiro uyu muhango wari uteganyijwe kuba kuwa Gatandatu tariki ya 29 Ukuboza 2012 cyaje kwimurirwa kuwa Mbere tariki ya 31 Ukuboza 2012, ku bw’ubukererwe bw’umuhanzi w’icyamamare Chris Brown wari umutumirwa w’icyubahiro.

Ubwo benshi bari bamaze kwishyiramo ko uwo muhango uba kuri uyu wa Mbere tariki ya 31 Ukuboza 2012, ku mugoroba wo kuwa Gatandatu itariki yarongeye irahindurwa, ibyari kuwa Mbere bishyirwa ku Cyumweru tariki ya 30 Ukuboza 2012, kuko bari bamaze kumenya ko Chris Brown yari busesekara mu masaha ya saa z’igitondo ku Cyumweru azanye na Rihanna.

Saa saba z’amanywa zo ku Cyumweru Chris Brown yagombaga kuririmbira muri Stade ya Felix-Houphouet-Boigny, aho kwinjira byari ibihumbi cumi na bitanu n’ibihumbi makumyabiri by’amafaranga (CFA) mu myanya y’icyubahiro (15,000 na 20,000 CFA) ni ukuvuga asa n’angana n’ayo uyashyize mu mafaranga y’Amanyarwanda.

Mu masaha ashyira saa mbiri z’ijoro hari hateganijwe igitaramo cyo guhemba abahanzi bitwaye neza cyagombaga kubera kuri Hôtel Ivoire, aho kwinjira byari ibihumbi mirongo itanu na Miliyoni by’amafaranga (CFA) (50,000 na 1,000,000 CFA) ni ukuvuga angana nk’ayo uyashyize mu Manyarwanda.

Gusa aha hombi ababyitabiriye bari ngerere, nk’uko RFI n’ibindi bitangazamakuru byabitangaje.

Chris Brown yavuze ko ataririmba Stade nituzura

Ubwo yageraga kuri Stade ubusanzwe ijyamo abantu 65,000 yagombaga kuberaho igitaramo agasanga abantu ni bacye, Chris Brown yavuze ko adashobora kuririmba hatuzuye.

Abateguye ibitaramo baje kugabanya ibiciro, ni uko bashyira kuri 1/3 cy’ayo bari bishyuje, ariko nabwo babura abantu, bageza ubwo kwinjira babigira ubuntu nabyo biranga biba ay’ubusa.

Gusa Chris Brown yaje kwisubiraho ni uko aririmba indirimbo nke mu ndirimbo ze.

Mu bari guhabwa ibihembo, benshi mu bahatanaga ntibari bahari. Bivuga ko iki gitaramo ubundi cyagombye kuba ari cyo gikomeye kurusha ibindi mu guhemba abahanzi muri Afurika, cyaranzwe no guhuzagurika, n’imitegurire mibi.

Uretse abatumirwa bari babuze, na benshi mu bari guhabwa ibihembo bakomoka mu bihugu bitandukanye bya Afurika ntibari bahari.

Umuhango wo gutanga ibihembo bya Kora Awards ufatwa nk’igikorwa cy’agahebuzo kurenza ibindi mu rwego rwa muzika Nyafurika kuva mu mwaka w’1994, ubwo ibi bihembo byatangirwaga bwa mbere muri Afurika y’Epfo.

Abategura itangwa ry’ibi bihembo biseguye ku bafana n’abakunzi b’umuziki bavuga ko bakuye isomo.

Uretse kuba Kidum, yaregukanye mo kimwe mu bihembo 24 byahatanirwaga, nta makuru y’abahanzi nyarwanda bari barimo guhatana aribo Sacha na Tonzi bari bari mu bahatana twari twamenya muri aya marushanwa.

Icyumba cyagombaga kuberamo igitaramo
Kori Hotel naho nta bantu bari bahari
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO