Cote d’Ivoire: 60 ntibabashije kwinjira mu mwaka mushya

Cote d’Ivoire: 60 ntibabashije kwinjira mu mwaka mushya


Yanditswe kuya 1-01-2013 - Saa 16:24' na Emmanuel Kanamugire

Mu ijoro ryo ku wa 31 Ukuboza 2012, i Abidjan muri cote d’Ivoire abantu bagera kuri 60 bapfuye naho abarenga 50 barakomereka mu mubyigano wo kwishimira ko bagiye kwinjira mu mwaka mushya wa 2013.

Ibiro ntaramakuru by’Abafaranga AFP byatangaje iyi nkuru bivuga ko abapfuye n’abakomeretse bakandagiwe n’imbaga y’abinjiraga muri sitade nini yo mu Mujyi wa Abidjan bategereje kureba iraswa ry’ibishashi by’umuriro nk’ikimenyetso cy’uko umwaka mushya utangiye.

Ibi byemejwe n’ubuhamya bwatanzwe na Lieutenant-colonel Isa Sako, umwe mu basirikare bakora akazi ko gutanga lisansi wari uri aho, yatangaje ko abantu babyiganye ubwo kurasa ibishashi byari birangiye bagakandagirwa na bagenzi babo ari byo byateye bamwe gushiramo umwuka.

Ahabereye umubyigano hasigaye imwe mu myambaro y'abashakaga kureba uko haraswa ibishashi

Abapfuye biganjemo urubyiruko ruri mu kigero cy’imyaka 18. Umukuru wa Cote d’Ivoire Alassane Ouattara yasuye abakomeretse bari mu bitaro, yizeza ko hazakorwa iperereza ryo kugaragaza imbarutso y’uyu muvundo.

Nyuma y’umwaka wa 2011, hari ku nshuro ya kabiri mu Mujyi wa Abidjan haraswa ibishashi by’umuriro byerekana ko umwaka mushya utangiye.

Iyi mihango benshi bayifataga nk’ikimenyetso cy’igihugu gishya, nyuma y’imvururu za nyuma y’amatora yo mu Kuboza 2010-Mata 2011 zahitanye abagera ku bihumbi bitatu.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO