Bagosora n’abandi 3 bagiye gufungirwa muri Mali, abandi 4 bajyanywe muri Benin

Urukiko Mpuzamahanga Mpanabyaha Rwashyiriweho u Rwanda rukorera Arusha muri Tanzania, rwohereje abantu bamaze guhamwa n’ibyaha bagera kuri bane mu gihugu cya Mali barimo na Bagosora, abandi 4 nabo boherejwe muri Benin, kuri uyu wa Gatatu tariki ya 4 Nyakanga 2012.

Abo 4 boherejwe muri Mali barimo, Munyakazi Yusuf, Renzaho Tharcise, Ntawukukuriryayo Dominique na Bagosora Théoneste mu gihe aboherejwe muri Benin ari Ntabakuze Aloys, Hategekimana Ildephonse, Gaspard Kanyarukiga ndetse na Kalimanzira Callixte.

Kugeza ubu ruriya Rukiko rumaze kohereza abahamwe n’ibyaha bagera kuri 14 mu gihugu cya Benin, nyuma yaho mu kwezi kwa Werurwe ku itariki ya 20, 2012 hari hoherejwe yo 3 , kandi nabo bari basanze yo abandi, mugihe mu gihugu cya Mali hamaze kugera yo abagera kuri 19.

Mu itangazo rigenewe abanyamakuru Urukiko rwashyize ahagaragara rivugako Barayagwiza Jean Bosco ndetse na Rutaganda George bapfiriye mu gihugu cya Benin mu mwaka wa 2010.

Nkuko tubikesha UN News, Jean Bosco Barayagwiza yari yarakatiwe igifungo cy’imyaka 32 kandi yafpuye ku itariki ya 25 Mata 2010, naho Rutuganda Georges yari yarakatiwe igifungo cya burundu, apfa ku itariki ya 11Ukwakira 2010.

Imirimo y’uru Rukiko yari iteganijwe kuba yararangiye ku itariki ya Nyakanga 2012, ariko abakozi barwo 4 basabwe gukora imyaka y’ikirenga kugirango imanza batangiye bazazisoze bitarenze umwaka wa 2014.