Zingman wavuzweho gucuruza intwaro kuri Perezida Lungu wa Zambia, afungiye muri RDC

Yanditswe na Bukuru JC
Kuya 24 Werurwe 2021 saa 10:17
Yasuwe :
0 0

Nyuma yo kugirana ibiganiro na Joseph Kabila wahoze ari Perezida wa Repubulika Iharanira Demokarasi ya Congo (RDC), Alexander Zingman, ukomoka muri Belarus, yatawe muri yombi mu gace ka Lubumbashi, nyuma y’uko inzego z’iperereza zibajije uwo mugabo ikimugenza ndetse n’ubucuruzi akora muri Congo undi akabura ibisubizo.

Zingman ni umugabo uzwi cyane mu bikorwa by’ubucuruzi bw’intwaro butemewe n’amategeko, ndetse mu 2020, yashinjwe n’ikinyamakuru Digger News kuba yaragiranye ubufatanye na Perezida Edgar Lungu wa Zambia, nyuma y’uko uyu mugabo agaragaye kuri Ambasade ya Zambia iri Moscow mu Burusiya, ari kumwe na Perezida Lungu, Umunyamabanga Uhoraho muri Minisiteri y’Ingabo, Sturdy Mwale n’Umuyobozi w’Ingabo zirwanira mu kirere muri Zambia, Lt. Gen. David Muma.

Perezida Lungu kandi yigeze gukomozwaho na Callixte Sankara wahoze ari Umuvugizi w’Umutwe w’Iterabwoba wa FLN, nyuma akaza gutabwa muri yombi n’inzego z’u Rwanda kuri ubu akaba ari mu nkiko aburana ku byaha aregwa.

Icyo gihe yavuze ko ibikorwa by’umutwe wabo byari bishigikiwe na Perezida Edgar Lungu wa Zambia, ngo wari waremereye Paul Rusesabagina 150$ y’inkunga, yagombaga gukoreshwa mu bikorwa byo guhungabanya umutekano w’u Rwanda.

Perezida Lungu yarabyamaganye, anohereza intumwa ye i Kigali kugira ngo asobanurire Perezida Kagame iby’ubwo bufatanye.

Uyu Zingman wigeze kugaragara ari kumwe na Perezida Lungu yamaze gutabwa muri yombi muri Congo, amakuru avuga ko ashobora kuba yari mu mugambi na Joseph Kabila wahoze ayobora Congo, wo gushaka uburyo yamugezaho intwaro mu buryo butemewe n’amategeko, dore ko uyu mugabo adafitanye umubano mwiza na Perezida Félix Tshisekedi wamusimbuye ku butegetsi.

Zingman yakunze gushinjwa kwijandika mu bikorwa by’ubucuruzi bw’intwaro zitemewe n’amategeko cyane cyane izivuye mu Burusiya zigacuruzwa muri Afurika no mu Burasirazuba bwo Hagati, ni umugabo w’umukire cyane ufite ibikorwa by’ubucuruzi mu bihugu birimo Zimbabwe, ndetse akaba anafite ubwenegihugu bwa Amerika.

Perezida Edgar Lungu afitanye umubano wihariye na Zingman uzwi mu bucuruzi bw'intwaro
Zingman ni umugabo wisanga cyane muri Zambia
Zingman ni inshuti ya Perezida Lungu n'ubwo agira uruhare mu bikorwa bitandukanye by'ubucuruzi bw'intwaro zitemewe n'amategeko
Zingman yafungiwe muri Repubulika Iharanira Demokarasi ya Congo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .