Zimbabwe: Perezida mushya, Emmerson Mnangagwa bakunze kwita "Ingona" ararahira

Yanditswe na Herve Ugirumukunda
Kuya 24 Ugushyingo 2017 saa 08:26
Yasuwe :
0 0

Uwahoze yungirije Robert Mugabe, Emmerson Mnangagwa arahirira kuba Perezida w’Inzibacyuho wa Zimbabwe kuri uyu wa Gatanu, hashize umunsi umwe Mugabe n’umugore we bahawe ubudahangarwa bakemererwa no kuguma mu gihugu.

Mugabe yeguye ku wa Kabiri hari hashize imyaka 37 ari ku butegetsi n’icyumweru igisirikare kibumwambuye agafungirwa iwe mu rugo.

CNN ivuga ko Mnangagwa yagarutse mu gihugu ku wa Gatatu aje kuyobora, maze mu ijambo yavugiye imbere y’ikivunge cy’abamushyigikiye, asezeranya ko azayobora igihugu muri demokarasi. Ntiyigeze avuga ku hazaza ha Mugabe.

Col. Overson Mugwisi, Umuvugizi w’Igisirikare cya Zimbabwe, ZDF, yavuze ko ibiganiro hagati yabo na Mugabe byari bimaze icyumweru byarangiye yemerewe kutazakurikiranwa no gucungirwa umutekano we n’uw’umugore we.

Uyu mukambwe w’imyaka 93 avugwaho kuyoboza igitugu no kwica abo batavuga rumwe, imiryango iharanira uburenganzira bwa muntu yakunze gusaba ko ashyikirizwa ubutabera.

Ashinjwa kuba yarashyigikiye ubwicanyi hagati mu 1980 bwibasiye abo mu bwoko bwa Ndebele buzwi cyane ku izina rya ‘Gukurahundi’. Abashakashatsi basanze bwarahitanye abaturage bagera ku bihumbi 20.

Anashinjwa ruswa no kwigwizaho imitungo akabaho mu buzima bwa giherwe kandi igihugu cye n’abaturage babayeho mu bukene bukabije.

Ku wa Mbere, mbere y’uko yemera kwegura, gisirikare cyanamwemereye kugumana myinshi mu mitungo ye.

Mu ijambo rya Mnangagwa ku wa Gatatu, yasobanuye ko yagize uruhare runini mu bikorwa bya gisirikare byo gukuraho Mugabe, kuko bamumenyeshaga buri kintu cyose kibaye.

Ishyaka ry’abatavuga rumwe na Leta, MDC-T riyobowe na Morgan Tsvangirai rifite impungenge z’uruhare igisirikare kizagira mu butegetsi Mnangagwa amaze kuba Perezida akazaba ari nawe mugaba w’ikirenga wacyo.

Tsvangirai yasabye ko amatora ateganyijwe mu mwaka utaha yazaba mu mucyo dore ko amaze kwiyamamaza inshuro eshatu ahanganye na Mugabe agatsindwa. Mu 2013 yavuze ko bamwibye amatora.

Hari benshi batishimiye Mnangagwa ko aba perezida kuko yagiye ashyigikira gahunda nyinshi za Mugabe. Azwi ku izina ry’ingona kubera uburambe afite muri politiki; ndetse kimwe n’uwo asimbuye ashinjwa uruhare mu bwicanyi bwo muri za 1980.

Tsvangirai asaba Mnangagwa gukora iyo bwabaga, agasibanganya amateka ye mabi akareba uko yazamura igihugu cye gifite ubukungu bujegajega.

Ati “Mnangagwa ndamuzi bizamusaba gukora cyane ngo ahindure imyitwarire ye bityo ashobore kubaka isura y’umuntu ugendera kuri demokarasi, uzanye impinduka. Nubwo mbishindikanyaho, nawe arabizi ko atagendera mu nzira ya Mugabe ngo yigarurire imitima y’abaturage.”

Mnangagwa w’imyaka 75 yari amaze imyaka itatu ari Visi-Perezida wa Zimbabwe kuva mu 1980 yari muri guverinoma aho yabaye Minisitiri w’Ubutabera, uw’Ingabo, uw’Imyubakire yo mu Cyaro, Umukuru w’Inteko, Minisitiri w’Imari n’uw’Umutekano w’Imbere.

Perezida mushya wa Zimbabwe, Emmerson Mnangagwa ararahira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza