Kwamamaza

Zimbabwe: Leta igiye kwirukana abakozi ibihumbi 25

Yanditswe kuya 10-09-2016 saa 18:06' na Jean Louis Uwishyaka


Guverinoma ya Zimbabwe yamaze gutangaza ko igiye kwirukana abakozi bagera ku bihumbi 25 ndetse inakurireho agahimbazamusyi k’imyaka ibiri iri imbere abakozi bazaba bagize amahirwe yo kuguma mu mirimo yabo.

Ibi Leta ibikoze mu rwego rwo kugabanya ingano y’amafaranga yabatangwagaho (imishahara) mu gihe igihugu cyugarijwe n’ikibazo cy’ubukungu butifashe neza cyatangiranye n’igwa ry’agaciro k’ifaranga ryacyo mu 2008.

Patrick Chinamasa, Minisitiri w’Imari muri iki gihugu yatangarije abadepite kuri uyu wa Kane w’iki cyumweru ko Leta yahuraga n’ikibazo gikomeye cyo kwishyura aba bakozi imishahara yabo bivugwa ko yatwaraga hafi 97% by’ingengo y’imari y’umwaka.

Ngo iki cyemezo nikimara gushyirwa mu bikorwa akayabo katangwaga kuri aba bakozi ngo kazagabanuka kagere kuri 75% mu mpera z’uyu mwaka nkuko BBC ibitangaza.

Ibi bije bikurikira imyigaragambyo ikomeye yabaye muri Nyakanga uyu mwaka ikozwe n’abakozi muri iki gihugu bitewe n’itinda ry’imishahara yabo, aho Leta ya Zimbabwe yari yananiwe kwishyura abakozi bayo biganjemo abasirikare, abarimu n’abaganga.

Minisitiri Chinamasa avuga ko bashatse gufata iki cyemezo mu mwaka ushize ariko bikaza gutambamirwa n’inama y’abaminisitiri yateye utwatsi uyu mugambi.

Bitewe n’ibibazo by’ubukungu byugarije Zimbabwe, amasosiyete 10,000 yakoraga ibintu bitandukanye yafuze imiryango mu myaka ishize bitewe n’ibihombo yagize.

Leta ya Zimbabwe yagerageje ibishoboka byose ngo ishake uko yakwikura mu bukene bwugarije igihugu ibinyujije mu kuzamura imisoro, gusa na byo ngo byayibereye insobe.

Ibi bibazo kandi byasize igihugu mu bibazo by’amapfa aho abaturage batari bake batunzwe n’imfashanyo z’ibiribwa zitangwa n’abagiraneza.

Leta itangaza ko ubwo icyemezo cyo kwirukana aba bakozi ndetse no gukuraho agahimbazamusyi ku bazaba basigaye mu mirimo kizaba gishyizwe mu bikorwa, Leta izabasha gucungura miliyoni 118 z’amadorali ya Amerika yagenderaga mu duhimbazamusyi tw’abakozi buri mwaka.

Ibi bibazo by’ubukungu ndetse na ruswa ivuza ubuhuha muri Zimbabwe, biri mu bituma abatavuga rumwe n’ubutegetsi botsa igitutu Perezida Robert Mugabe ngo ave ku butegetsi amazeho imyaka 29, gusa we ababwira ko adateze kuva ku butegtsi keretse apfuye.

Patrick Chinamasa avuga ko bagiye kwirukana abakozi 25,000 ndetse banakureho agahimbazamusyi ku basigaye

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved