Zimbabwe: Ababyeyi bemerewe kwishyura ihene mu cyimbo cy’amafaranga y’ishuri

Yanditswe na
Kuya 20 Mata 2017 saa 01:54
Yasuwe :
0 0

Minisiteri ifite uburezi mu nshingano zayo muri Zimbabwe yatangaje ko kuri ubu abaturage bemerewe gutanga amatungo arimo ihene cyangwa bakajya gukora imirimo y’amaboko ku bigo by’amashuri mu cyimbo cyo kwishyura amafaranga y’ishuri ku bana babo.

Minisitiri ushinzwe amashuri abanza n’ayisumbuye, Lazarus Dokora yabwiye ikinyamakuru cyo muri Zimbabwe ko ababyeyi benshi bagorwa no kubona amafaranga mu gihe ifaranga ry’iki gihugu ryataye agaciro mu buryo bukomeye.

Dokora yavuze ko amashuri agomba korohereza ababyeyi bakemererwa gutanga amatungo cyangwa bagakora imirimo isimbura amafaranga y’ishuri bagombaga kwishyura.

Aya matungo azajya ahabwa agaciro n’abayobozi b’amashuri yaba abanza n’ayisumbuye bafatanyije n’abahagarariye ababyeyi, bityo amafaranga avuyemo akoreshwe mu gutunganya ibikorwaremezo by’amashuri cyangwa guteza imbere ubuhinzi bwayo.

Iki cyemezo cyakuruye impaka ku mbuga nkoranyambaga, bamwe bavuga kigiye gutuma habaho igisa n’ubucuruzi mu bigo by’amashuri.

Umunyamabanga Mukuru w’Ishyirahamwe ry’abarimu muri Zimbabwe yavuze ko iki atari icyemezo kiramba asaba inzego za leta kugisubiramo.

Ati “Ndahamya ko iki atari icyemezo gikwiye ku mashuri yo mu mujyi no mu cyaro. Tekereza ababyeyi bagera ku 1000 bahuriye ku kigo cy’ishuri mu mirimo y’amaboko. Ntibizaba byubahishije abo bireba. Ni gute bakora imirimo y’ingufu mu kigo cy’ishuri kandi bashobora kujya gushaka akandi kazi ahandi?”

Abandi banenga iki cyemezo bavuga ko kibereye abaturage bo mu byaro gusa ndetse mu gihe cyaba gishyizwe mu bikorwa ibigo by’amashuri bitazabona amafaranga yo gutuma ibikorwa byabyo bikomeza nk’uko bisanzwe.

Leta ngo yagombye kugira uruhare mu gukemura ikibazo kiri mu gihugu, buri muturage akabasha kubona amadolari akabasha kwishyurira umwana we amashuri.

BBC ivuga ko iki cyemezo kije gikurikira icyo mu cyumweru gishize giha ububasha abaturage bo muri Zimbabwe gutanga ingwate zirimo amatungo nk’inka, ihene n’intama mu gihe bakeneye inguzanyo mu mabanki.

Ibura ry’amafaranga muri Zimbabwe rituma abaturage bahora ku mirongo bashaka kubikuza.

Leta ivuga ko iki kibazo giterwa n’uko hari abaturage benshi bajya kubitsa amadolari hanze y’igihugu ariko abayinenga bakemeza ko biterwa n’ibura ry’abashoramari no kwiyongera k’ubushomeri.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244