Kwamamaza

Ababa mu mahanga basa n’abakumiriwe mu matora Mugabe aziyamamazamo

Yanditswe kuya 17-11-2016 saa 08:30' na Nsengimana Evariste


Perezida wa Zimbabwe, Robert Mugabe, umukambwe w’imyaka 92 y’amavuko yatangaje ko aziyamamaza mu matora y’umukuru w’igihugu azaba mu 2018, asa n’ayahejwemo abavuka muri iki gihugu baba mu mahanga.

BBC dukesha iyi nkuru yatangaje ko komisiyo Y’amatora yahamije ko abanya-Zimbabwe baba mu bihugu by’amahanga batazigera bemererwa gutorera mu bihugu babarizwamo.

Ibi bije bisa n’ibivuguruza ibikubiye mu Itegeko Nshinga ry’iki gihugu ryavuguruwe mu 2013, kuko riha uburenganzira busesuye abahavuka baba mu bihugu by’amahanga bwo gutorera aho bari.

Iyi komisiyo yashimangiye ko abo baturage bagomba kuza mu gihugu cyabo bakibaruza kimwe n’abandi baturage ndetse bakaba ari na ho batorera.

Gusa iki cyemezo gisa n’aho ari urucantege ku mamiliyoni y’abaturage ba Zimbabwe baba mu mahanga bakoze ibishoboka byose ngo batore.

Amashyaka atavuga rumwe n’ubutegetsi bwa Mugabe yamaganiye kure icyo cyemezo avuga ko kigamije kubangamira aba baturage no kubabuza uburenganzira bwo gutora.

Abaturage bagera kuri miliyoni enye z’Abana-Zimbabwe, bavuye mu gihugu bahunze ibibazo bya politiki n’iby’ubukungu byibasiye iki gihugu mu myaka myinshi ishize.

Abenshi bahawe ubuhungiro mu bindi bihugu mu gihe abandi babibamo mu buryo butemewe n’amategeko.

Nubwo hari bamwe mu bavugaga ko Perezida Mugabe ashobora kutiyamamaza muri aya matora yo mu 2018, ahanini bashingira ku myaka afite, ku bwe yamaze gutangaza ko azongera kwiyamamaza azakorwa mu gihe azaba agejeje imyaka 94.

Kuva mu 1980, Abanya-Zimbabwe ntibazi undi muyobozi w’igihugu utari Mugabe, kuko kuva iki gihugu cyakwigobotora ingoma y’ubukoloni bw’Abongereza muri uwo mwaka ari we ukiyobora.

Ni kenshi abatavuga rumwe bagaragaje ko batishimiye uyu muyobozi wabo bamusaba kuva ku butegetsi, ariko we yaberuriye ko azava ku butegetsi ari uko yamaze gushiramo umwuka. Yakunze kurangwa n’intege nke aho rimwe na rimwe yafotorwaga yasinziriye mu nama yabaga yitabiriye, ubundi akitura hasi n’ibindi.

Ubutegetsi bwa Mugabe bwakunze kurangwa n’ihungabana rikomeye ry’ubukungu byanatumye ifaranga ry’iki gihugu rita agaciro ku buryo bukomeye.

Perezida Mugabe yemeje aziyamamaza mu matora ateganyijwe mu 2018

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved