Zambia yasubije Zimbabwe utavuga rumwe n’ubutegetsi wari wayihungiyeho

Yanditswe na Ferdinand Maniraguha
Kuya 9 Kanama 2018 saa 06:45
Yasuwe :
0 0

Ubutegetsi bwo muri Zambia bwasubije Zimbabwe, Tendai Biti, utavuga rumwe n’ubutegetsi wari wahunze nyuma y’uko inzego z’umutekano zitangiye kumuhiga akekwaho uruhare mu mvururu zakurikiye amatora aherutse.

Reuters dukesha iyi nkuru yatangaje ko Tendai yahise atabwa muri yombi nyuma yo gusubizwa mu gihugu cye.

Polisi ya Zimbabwe yahigaga Tendai na bagenzi be umunani bakekwaho uruhare mu myigaragambyo yakurikiye amatora mu minsi ishize, ubwo uwo mugabo yatangazaga ko utavuga rumwe n’ubutegetsi Nelson Chamisa ari we watsinze mu gihe Komisiyo y’amatora yo yatangaje ko Emmerson Mnangagwa ari we watsinze.

Imyigaragambyo yakurikiye amatora yaguyemo abantu batandatu ubwo inzego z’umutekano zashyamiranaga n’abashyigikiye Chamisa.

Ishyaka People’s Democratic Party, Tendai, abarizwamo ryari rishyigikiye Nelson Chamisa w’ishyaka MDC.

Tendai akimenya ko ari gushakishwa yahise agerageza guhungira muri Zambia aciye ku mupaka wa Chirundu uherereye mu majyaruguru y’umurwa mukuru Harare.

Ubwo yari ageze ku mupaka, ubusabe bwe bwateshejwe agaciro.Yahise ajyanwa mu ishuri riri hafi aho mu gihe Zambia yari igitegereje kumushyikiriza inzego z’umutekano za Zimbabwe.

Umwe mu banyamategeko ba Tendai, Gilbert Phiri yavuze ko urukiko rukuru muri Zambia kuri uyu wa Gatatu rwatanze itegeko ryo kudasubiza Tendai mu gihugu cye ariko inzego zishinzwe abinjira n’abasohoka zikabirengaho.

Tendai wigeze kuba Minisitiri w’Imari si ubwa mbere ashakishwa azira gutangaza ibyavuye mu matora bitandukanye n’ibya Komisiyo y’amatora kuko no mu mwaka wa 2008 byamubayeho ubwo yemezaga ko Morgan Tsvangirai yatsinze Robert Mugabe.

Tendai yasubijwe muri Zimbabwe ahita atabwa muri yombi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza