00:00:00 IGIHE NETWORK KN KINYARWANDA EN ENGLISH FR FRANCAIS

Yahya Jammeh mu nzira zisubira muri Gambia yemye

Yanditswe na Bukuru JC
Kuya 7 Nzeri 2021 saa 07:54
Yasuwe :
0 0

Ishyaka rya Yahya Jammeh wahoze ayobora Gambia n’irya Perezida uriho, Adama Barrow byiyunze bishyira hamwe, umwanzuro uca amarenga yo kugaruka kwa Jammeh mu gihugu yahunze mu myaka ine ishize.

Uku kwihuza kw’aya mashyaka kugamije guhuza ingufu kugira ngo Adama Barrow azabashe gutsindira indi manda mu matora ya Perezida ateganyijwe mu Ukuboza uyu mwaka.

Umunyamabanga Mukuru w’ishyaka APRC rya Yahya Jammeh ari we Fabakary Tombong Jatta, kuri iki Cyumweru yabwiye abanyamakuru ko amasezerano n’ishyaka NPP rya Adama Barrow, harimo no kugaruka kwa Jammeh.

Ati “ Intego yacu ni uko Perezida Jammeh yagaruka mu gihugu mu mahoro kandi mu cyubahiro.”

Ni rimwe mu masezerano bagiranye na Perezida Barrow mu gihe yaba atsindiye manda ya kabiri.

Yavuze ko kandi ari amahirwe akomeye ku bumwe n’ubwiyunge muri Gambia, kuko Jammeh yari afite benshi bamwiyumvamo.

Imiryango irengera uburenganzira bwa muntu yafashe ayo masezerano nk’ubugambanyi, kuko Yahya Jammeh akekwaho uruhare mu byaba n’itotezwa byakorewe abaturage be mu myaka 22 yamaze ku butegetsi.

Jammeh yatangiye kuyobora Gambia mu 1994 ahiritse ubutegetsi, aburekura mu 2017 ubwo yatsindwaga mu matora na Adama Barrow. Yahise ahungira muri Guinée équatoriale.

Guverinoma ya Barrow yashyizeho komisiyo ishinzwe ukuri n’ubwiyunge, igamije kugaragaza ibyaha byakozwe ku bwa Jammeh.

Ni Komisiyo byari byitezwe ko izasiga igaragaje ibyagenderwaho n’ubutabera mu kuburanisha Yahya Jammeh. Impungenge zihari ni uko ubwo bwumvikane bwabayeho bushobora gutuma Jammeh atagezwa imbere y’ubutabera.

Yahya Jammeh yari amaze imyaka ine yarahunze igihugu yayoboye imyaka 22

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .