Volkswagen ifitiye icyizere isoko ry’imodoka muri Afurika

Yanditswe na Ferdinand Maniraguha
Kuya 10 Nyakanga 2018 saa 04:42
Yasuwe :
0 0

Uruganda rw’Abadage rukora imodoka, Volkswagen, rwatangaje ko rushaka kongera umubare w’imodoka rukorera mu mashami yarwo muri Afurika, rugamije kwigarura isoko ryo kuri uyu mugabane ritarugendekeye neza mu myaka itatu ishize.

Uru ruganda rwatangaje ko rushaka kongera imodoka zikorerwa mu ishami ryarwo riri muri Afurika y’Epfo ndetse n’iryo muri Kenya zikagera ku 24300.

Umuyobozi Mukuru wa VolksWagen ishami ryo muri Afurika y’Epfo, Thomas Schaefer yabwiye Rwanda Today ko bashaka kongera imodoka zikorwa n’uruganda rwabo muri i Thika muri Kenya, zikava kuri 300 zakozwe umwaka ushize zikikuba kabiri.

Uru ruganda ruvuga ko umwaka ushize rwahuye n’ingorane zatumye imodoka zarwo zitagurwa cyane muri Kenya, kubera impungenge bamwe bari bafitiye amatora yabaye muri icyo gihugu ndetse n’ubukungu butari bwifashe neza.

Muri Kenya umwaka ushize hagurishijwe imodoka 67 000 ubariyemo inshyashya n’izashaje, uretse ko n’isoko ry’imodoka ku mugabane wa Afurika muri rusange ritagenze neza.

Bivugwa igurishwa ry’imodoka ku mugabane muri uwo umwaka ryamanutseho 9 %, rikava kuri miliyoni 1.32 z’amadolari mu 2016 rikagera kuri miliyoni 1.19$.

Ibihugu igura n’igurishwa ry’imodoka ryazamutse ugereranyije n’umwaka wari wabanje ni Misiri, Algeria, Tunisia, Nigeria na Libya.

Icyakora Volkswagen ibona Afurika nk’umugabane utanga icyizere ku isoko ry’imodoka ari na yo mpamvu iri kongera ubushobozi bw’uruganda rwayo muri Afurika y’Epfo kugira ngo rubashe guhaza umugabane.

Urwo ruganda rurifuza ko imodoka rukora ziva ku 111 000 zakozwe umwaka ushize zikagera 135 000 uyu mwaka.

Umwaka ushize Afurika y’Epfo niyo yaje imbere mu kugurisha imodoka nyinshi aho zari 356 000, ikurikirwa na Maroc yagurishije imodoka 155 000, naho Misiri na Nigeria buri kimwe kigurisha imodoka 100 000.

Inganda zikora imodoka zibona Afurika nk’umugabane urimo amahirwe by’umwihariko kubera amasezerano y’isoko rusange aherutse gusinyirwa i Kigali yitezweho gufungurira amarembo ubuhahirane hagati y’abanyafurika ndetse n’ubukungu bukomeje kwiyongera mu bihugu bigize uwo mugabane.

Icyakora izo nganda ziracyagaragaza impungenge z’uko muri Afurika nta ngamba zihari zo guca imodoka zakoze, bibangamira ibidukikije ndetse n’ihangwa ry’imirimo mishya.

Mu kwezi gushize ubwo yatangizaga ibikorwa by’uruganda rwa Volkswagen mu Rwanda, Perezida Paul Kagame unayoboye Umuryango wa Afurika Yunze Ubumwe (AU) yavuze ko Afurika idakwiriye kuba ikimoteri cy’imodoka zishaje.

Yagize ati “Afurika ntikeneye kuba ikimoteri cy’imodoka zishaje cyangwa ikindi kintu cyakoreshejwe. Iyo ugiye no kureba usanga wishyuye igiciro kinini. Niba wishyura igiciro kinini ku byakoreshejwe, kuki utacyishyura ugura ikintu gishya? Afurika n’u Rwanda bakwiye ibyiza kandi ubu ni bumwe mu buryo bwo kwerekana ko bashobora kubigura.”

Ikigo Volkswagen Mobility Solutions Rwanda giherereye mu gice cyahariwe inganda i Masoro mu Karere ka Gasabo, kikazajya giteranya imodoka 5000 ku mwaka zizanagera ku 10 000 zo mu bwoko bwa VW Polo, VW Passat, VW Tiguan, VW Teramont na VW Amarok.

Nibura abantu bari hagati ya 500 na 1000 bazabona imirimo kubera iki kigo cya Volkswagen cyatangiye gukorera mu Rwanda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza