Uwabaye Miss Gambia yatanze ubuhamya bw’uko Yahya Jammeh yamufashe ku ngufu

Yanditswe na IGIHE
Kuya 1 Ugushyingo 2019 saa 03:43
Yasuwe :
0 0

Fatou Jallow wigeze kuba nyampinga wa Gambia yatanze ubuhamya bw’ukuntu Yahya Jammeh uri mu buhungiro, yamukingiranye mu cyumba akamufata ku ngufu ubwo yari Perezida w’icyo gihugu.

Uyu mutangabuhamya w’imyaka 23 kuri uyu wa Kane nibwo yarangije kumvwa na Komisiyo y’ukuri n’Ubwiyunge, asobanura ihohoterwa rishingiye ku gitsina ryakozwe ku ngoma ya Perezida Yahya Jammeh nk’uko Reuters yabitangaje.

Ati “Yahya Jammeh ntabwo yashakaga gukora imibonano mpuzabitsina cyangwa kwishimishanya nanjye, icyo yashakaga kwari ukumbabaza.”

Iki kinyamakuru cyanditse ko kitashoboye gucukumbura ubuhamya bw’uyu nyampinga cyangwa abandi bakobwa bavuga ko bafashwe ku ngufu n’abashinzwe umutekano babiri, n’uvuga ko yasambanyijwe n’uwari Minisitiri w’Umutekano ku ngoma ya Jammeh.

Kuva yatsindwa amatora mu 2017 y’umukuru w’igihugu, umwanya yari amazeho imyaka 22, Jammeh yahise ahungira muri Guinée Equatorial. Ashinjwa ko ubuyobozi bwe bwaranzwe no gukandamiza, kwica no gushimuta abaturage bya hato na hato.

Muri Mutarama uyu mwaka nibwo Komisiyo ishinzwe ukuri n’ubwiyunge yashyizweho na Perezida Adama Barrow, yatangiye guperereza kuri ibyo birego bimushinjwa.

Miss Jallow yabwiye iyo komisiyo ko ubuhamya bwe hari abantu bubuza amahoro ariko ko nta kundi byagenda mu gihe bashaka kuva muri iryo curaburindi.

Umuryango w’Abibumbye ugaragaza ko muri Gambia nibura umugore umwe muri batanu aba yarakorewe ihohoterwa rishingiye ku gitsina, ariko ugasanga kenshi abafashwe ku ngufu babigira ibanga banga guhabwa akato.

Umunyamategeko wa Jallow witwa Reed Brody yagize ati “Nizeye ko ibi bizatangiza ibiganiro muri Gambia byerekeye ihohoterwa rishingiye ku gitsina rikorerwa abakobwa n’abagore.”

Kugeza ubu abagore batatu nibo bamaze gushinja Jammeh kubafata ku ngufu. Uyu mukobwa yavuze ko azi neza ko hari abakorewe ubu bugizi bwa nabi n’ubu bakiri mu kazi ka Guverinoma.

Umuryango urengera abagore wo muri Amerika wavuze ko ufite icyizere ko Gambia igiye kwegeranya ubuhamya bw’akarengane bakorewe.

Mu minsi ishize kandi umusirikare wo muri Gambia yemeye ko yagize uruhare mu iyicwa ry’abimukira bagera kuri 50 byakozwe mu 2005 ku itegeko ryatanzwe na Yahya Jammeh wari perezida w’icyo gihugu.

Uwabaye Miss Gambia yatanze ubuhamya bw’uko Yahya Jammeh yamufashe ku ngufu
Yahya Jammeh yashinjwe gufata ku ngufu umukobwa wabaye nyampinga wa Gambia

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza