Kwamamaza

Hagaragajwe amakuru mashya ku nkomoko ya Perezida Ali Bongo wa Gabon

Yanditswe kuya 17-09-2016 saa 07:50' na Philbert Hagengimana


Imvururu zirarimbanije muri Gabon, ndetse Urukiko rushinzwe kurengera Itegeko Nshinga ruritegura kumara impaka zakurikiye amatora. Gusa ibyo ntibyabujije ko hatangazwa amakuru mashya ku nkomoko ya Perezida Ali Bongo wendaga gufatwa nk’utemerewe kwiyamamariza umwanya w’umukuru w’igihugu.

Kuri uyu wa kane tariki ya 15 Nzeri 2016, Ikinyamakuru Midi Libre cyatangaje inkuru icukumbuye ku nkomoko ya Ali Bongo, aho umunyamakuru wacyo Caroline Froelig yagaragaje ko uwo mugabo uheruka gutorerwa kuyobora Gabon yize mu ishuri riri mu gace ka Alès mu Majyepfo y’u Bufaransa.

Umunyamakuru Caroline Froelig yatangarije Radiyo Mpuzamahanga y’Abafaransa, RFI, ati “Jye nabanje kwibonanira n’abiganye na Ali Bongo witwaga Alain Bongo mbere y’uko umuryango we uhindura idini ukayoboka Islam mu 1973. Amafoto nabasanganye ni ayo mu 1965-1966. Ishuti ze ziramwibuka neza. Yari umuhungu udasanzwe, dore ko yanababwiraga ko Papa we ari Visi Perezida muri Gabon. Icyakora ngo ntibabyemeraga muri icyo gihe.”

Umwe mu bo biganye witwa Omar Krim yatangaje ko Ali Bongo (witwaga Alain Bongo) yari we mwirabura wenyine mu ishuri , ati “Ni we mwirabura wabaga muri iryo shuri, yari Njye mwarabu wabagamo gusa, kandi twaricaranaga.”

Hashingiwe ku mafoto Caroline Froelig yasanganye abo biganye na Bongo no kuba bemeza ko biganaga mu Bufaransa mu 1965-1966, amakuru y’uko Ali Bongo yaba yaratoraguwe n’umuryango wa Omar Bongo mu ntambara ya Biafra yaba ari ibinyoma, kuko yo yatangiye mu mwaka wa 1967.

Iyi nkuru ije ikurikira igitabo “Nouvelles Affaires Africaines” cyanditswe n’umunyamakuru w’Umufaransa, Pierre Pean mu 2014, aho yagaragaje ko Ali Bongo atabyawe na Omar Bongo n’umugore we Josephine, ko ahubwo akomoka muri Nigeria, akaba yaratoraguwe mu ntambara yiswe ‘Biafra’ bakamurera mu mpera z’imyaka y’1960.

Abajijwe icyo avuga ku kuba ibyo yanditse bihabanye n’ibyo abiganye na Bongo bavuga, Pierre Pean yavuze ko ibyo yanditse ari ukuri, ko ntacyo yavuga ku bindi byagaragajwe, ati “Ndemeza bidasubirwaho ko Ali Bongo atari umwana wabyawe na Joséphine Bongo na Albert Bernard Bongo.”

Avuga ko mu mwaka wa 1983 yanditse igitabo cyavugaga ku mubano w’u Bufaransa na Gabon, aho yagaragaje ko Josephine nta mwana yagiraga, kandi ko nta muntu n’umwe wigeze amunyomoza, ku bw’ibyo ngo ahamya ko ibyo yavuze ari ukuri.

Icyakora uyu munyamakuru w’umwanditsi yavuze ko agiye gukurikirana akamenya neza inkomoko y’ayo makuru y’uko Bongo yize mu Bufaransa mu 1965.

Pean kandi mu gitabo cye yavuze ko Bongo yahimbye impapuro z’amashuri yize, ngo kubera ko atari umuhanga mu ishuri, byatumye agira isoni zo kwerekana amanota yagiraga.

Alain Claude Bilie By Nze, Umuvugizi wa Perezida Ali Bongo yatangaje ko ibyatangajwe na Midi Libre bije bishimangira ibitangazwa n’igisekuru cya Bongo, akavuga ko yizeye ko bigiye guhagarika impaka yise “Umunuko”.

Mu batavuga rumwe n’ubutegetsi ho, Jean-Gaspard Ntoutoume Ayi, Ushinzwe itumanaho kwa Jean Ping wari uhanganye na Bongo mu matora y’umukuru w’igihugu yabaye uyu mwaka, yatangaje ko Ali Bongo yemerewe kwiyamamaza, bityo ko igikwiye guhabwa agaciro atari impaka, ahubwo ko ari ukuri kw’ibyavuye mu matora yo ku wa 27 Kanama 2016.

Byavuzwe mbere ko Ali Bongo atari umunya Gabon ndetse ko adakwiye kuyobora iki gihugu

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 1 Ukwakira 2016
Copyright © 2009 -2014 - IGIHE Ltd - All Rights Reserved