Urubanza ruregwamo umunyemari Moïse Katumbi rwatangiye kuburanishwa i Kinshasa

Yanditswe na IGIHE
Kuya 27 Kamena 2018 saa 09:57
Yasuwe :
0 0

Urubanza ruregwamo umuherwe Moïse Katumbi uri mu batavuga rumwe n’ubutegetsi muri Repubulika Iharanira Demokarasi ya Congo ushinjwa kwinjiza abacanshuro mu gihugu mu 2015, rwatangiye kuburanishwa kuri uyu wa Gatatu, tariki ya 27 Kamena 2018.

Moïse Katumbi Chapwe aregwa hamwe n’abandi batandatu barimo Umunyamerika Daryl Lewis bivugwa ko ari umwe mu bashinjwa kumufasha gushaka guhungabanya umutekano w’igihugu.

Abavoka b’abaregwa bavuze ko Daryl Lewis yagiye gushaka visa muri Ambasade ya Congo ariko ntiyayibona.

Uru rubanza rwaburanishirijwe mu Rukiko rw’Ikirenga mu gihe uyu muherwe wahoze ayobora Intara ya Katanga ari mu mahanga aho amaze imyaka ibiri mu buhungiro.

Abanyamategeko be bagaragaje ko nta nyandiko itumiza Katumbi n’Umunyamerika Darryl Lewis bareganwa ngo bitabe kuko bose bari mu mahanga.

Mu 2016 Katumbi yakatiwe n’Urukiko rw’Amahoro rwa Kamalondo i Lubumbashi, igifungo cy’imyaka itatu nyuma yo gushinjwa kubohoza ndetse akagurisha inzu y’Umugereki Alexandros Stoupis. Ashinjwa kandi kwinjiza abacancuro b’abanyamahanga mu gihugu no gutunga ubwenegihugu bw’u Butaliyani kandi bitemewe.

Urukiko rw’Ikirenga rwamenyesheje Umushinjacyaha Mukuru w’Igihugu urubanza ruregwamo Katumbi rwashyizwe ku wa 10 Ukwakira 2018.

Katumbi yatangarije BBC ku wa Kabiri ko ateganya kugaruka mu gihugu cye cy’amavuko muri gahunda zirimo no gutanga kandidatire ku mwanya w’umukuru w’igihugu mu matora ateganyijwe mu Ukuboza 2018.

Mu biganiro yagiranye n’abamukurikira kuri Twitter, Katumbi uzaba ahagarariye amashyaka atavuga rumwe n’ubutegetsi, yagize ati“Nziyamamariza mu gihugu kuko ni uburenganzira bwanjye n’umukoro. Ntacyo ntinya hagati ya tariki 24 Nyakanga na tariki 8 Kanama nzaba ndi Kinshasa.”

Uyu muherwe unayobora Ikipe ya TP Mazembe mu minsi ishize yafatiwe ku Kibuga cy’Indege cya Brussels bitewe n’ikibazo cya pasiporo, yavuze ko abayobozi ba RDC aribo bayitesheje agaciro.

Ku wa Mbere, itsinda ry’abadepite 50 muri Repubulika Iharanira Demokarasi ya Congo, bandikiye Perezida Joseph Kabila bamusaba “guhanagura” ibirego byose bagaraje ko bidafite ishingiro biharabika Katumbi.

Nyuma y’uko amatora asubitswe inshuro ebyiri muri RDC, ubu ateganyijwe ku wa 23 Ukuboza 2018. Kabila wagiye ku butegetsi mu 2001, yagombaga kubuvaho mu 2016 arangije manda ze ebyiri yemererwaga n’itegeko nshinga.

Abantu benshi bari ahaburanishirijwe uru rubanza ruregwamo Katumbi
Bari bitwaje ibyapa bigaragaza ko bashyigikiye Katumbi watangaje ko aziyamamariza kuyobora Repubulika Iharanira Demokarasi ya Congo
Umutekano wari ucunzwe cyane imbere no hanze y'urukiko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza