Umuyobozi muri AU yacucuriwe i Nairobi yitabiriye inama ya TICAD

Yanditswe na Philbert Girinema
Kuya 2 Nzeri 2016 saa 01:22
Yasuwe :
0 0

Umuyobozi Mukuru mu Muryango wa Afurika Yunze Ubumwe, AU, yaheze i Nairobi mu Murwa Mukuru wa Kenya, nyuma y’uko ibyangombwa bye by’inzira byibiwe mu nama mpuzamahanga yahuzaga ibihugu bya Afurika n’u Buyapani, TICAD VI, yasojwe ku Cyumweru.

Ikinyamakuru Daily Nation cyatangaje ko Islam Swaleh ushinzwe gahunda mu ishami rishinzwe guteza imbere abikorera muri AU, ibyangombwa bye n’izindi nyandiko z’ingenzi byatwariwe mu gikapu yabuze ku manywa yo kuwa Kane ahagana 4:30 muri Kenya.

Swaleh ngo yabibuze ubwo yari agiye gufata ibyangombwa byo kwinjira mu nama, asiga igikapu cye ku meza. Nyuma y’iminota mike yaragarutse arakibura ahita amenyesha abashinzwe umutekano.

Camera zifashishwa mu gucunga umutekano zerekana umugabo atwara igikapu cya Swaleh. Uwo ukekwaho ubujura yari yambaye ishati y’umweru n’ipantalo y’umukara, agitwaye mu kuboko kw’iburyo na telefoni yera mu kuboko kw’ibumoso.

Swaleh yabwiye Nation ati “Igikapu na mudasobwa byarimo inyandiko n’amakuru y’ingenzi, bimwe njya n’ahandi nari narabizigamye, birimo raporo z’ibyahise n’ibyateganywaga gukorwa.”

Mu byo yibwe harimo pasiporo ya AU, iy’Umuryango wa Afurika y’u Burasirazuba, EAC n’iya Kenya nk’igihugu akomokamo, zose zari mu gikapu yibwe kirimo na mudasobwa agendana, inyandiko z’akazi, itike y’indege, uruhushya rwo gutwara imodoka, imfunguzo z’imodoka ye n’ibindi.

Iyi nkuru yo gusiga igikapu isakaye nyuma y’undi muyobozi uheruka kurata ubunyangamugayo bw’Abanyarwanda. Uwo ni Umugande Aloysius Chebet, usanzwe ari umukozi mu biro Bikuru by’Umuryango wa Afurika y’u Burasirazuba, EAC, wataye ivarisi ye ku kibuga cy’indege cya Kigali i Kanombe ariko asubiyeyo arayibona n’ibyarimo byose.

Ku wa 11 Gicurasi ni bwo Aloysius Chebet ukuriye ishami ry’uburezi muri EAC yaje mu muhango wo guhemba abanyeshuri babaye aba mbere ku rwego rw’igihugu mu irushanwa ryo kwandika umuvugo ku mahoro muri uyu muryango.

Yageze i Kanombe ku Kibuga saa tatu z’ijoro, maze umushoferi wari umutegereje amujyana kuri hoteli, ariko yibagirwa gushyira mu modoka ivarisi yarimo ibintu byinshi harimo n’amafaranga kandi idafunze.

Baje kubona ko hari igikapu basize, umushoferi amusaba gusubirayo kubizana ariko Chebet we nta cyizere na gito afite cyo kubibona. Gusa agezeyo akavuga ko yibagiwe ivarisi, yahise arangirwa aho abapolisi bayimubikiye bari, maze ayihabwa nta kintu na kimwe kibuzemo.

Inama mpuzamahanga yahuzaga ibihugu bya Afurika n’u Buyapani, TICAD VI yitabiriwe n’abayobozi bakomeye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244