00:00:00 IGIHE NETWORK KN KINYARWANDA EN ENGLISH FR FRANCAIS

Umutwe wa ADF wivuganye abantu 19 mu Burasirazuba bwa Congo

Yanditswe na Muhonzire Sylvine
Kuya 30 Kanama 2021 saa 10:27
Yasuwe :
0 0

Umutwe witwaje intwaro ugendera ku mahame y’idini ya Islam wa, ADF, ukorera mu Burasirazuba bwa Repubulika Iharanira Demokarasi ya Congo mu Ntara ya Kivu y’Amajyaruguru, uracyekwaho kwivugana abantu 19 mu gitero cyagabwe ahitwa Kasanzi-Kithovo hafi ya Parike ya Virunga.

Izi nyeshyamba bivugwa ko zateye abaturage mu ijoro ryo kuwa Gatanu no kuwa Gatandatu tariki 27-28 Kanama 2021, zibasanze mu ngo zabo zikabiba zarangiza zigatwika inzu.

Nubwo bitaramenyekana neza niba ari ADF yakoze ayo mahano, Umuyobozi w’intara ya Buliki, Kalunga Meso, ndetse n’umuryango uharanira uburenganzira bwa muntu witwa CEPADHO bahamya ko ari zo kuko zimaze kwica abaturage babarirwa mu bihumbi cyane abatuye mu bice by’icyaro.

Umwe mu baturage wiciwe abantu bane muri iki gitero, Kahindo Lembula, yabwiye Reuters ati “Ubu sinzi aho ndi bujye n’abana banjye babiri, Imana yonyine niyo yadufasha.”

Guverinoma ya RDC iherutse gushyira intara ya Kivu y’Amajyaruguru mu bihe bidasanzwe ndetse muri Gicurasi ishyiraho ubuyobozi bwa gisirikare ikuraho ubw’abasivile mu kugabanya ibitero bya hato na hato byahitanaga abaturage ndetse bikangiza n’ibyabo.

Gusa ibyo bisa n’aho ntacyo byakemuye cyane kuko abaturage bakomeje gupfa, ndetse mu mpera za Nyakanga, iyi ADF yateye ibitero bibiri muri iyi ntara bigwamo abantu umunani.

Mu ntangiriro z’uku kwezi kwa Kanama, Perezida Félix Antoine Tshisekedi, yavuze ko ingabo zidasanzwe ziturutse muri Leta Zunze Ubumwe za Amerika ziri hafi kujya mu Burasirazuba bwa Congo guhangana n’iyi mitwe y’iterabwoba.

Muri werurwe uyu mwaka nibwo umutwe wa ADF washyizwe ku rutonde rw’imitwe y’iterabwoba na leta ya Washington kuko wavuze ko ufitanye isano n’ugendera ku matwara y’idini ya Islam[Islamic States] ndetse ukanigamba bimwe mu bitero byawo, gusa muri Kamena inzobere zo mu Muryango w’Abibumbye zatangaje ko nta gihamya kigaragaza ko ADF ikorana na IS.

Umutwe wa ADF bivugwa ko umaze kwica abasivile barenga 6000 kuva mu 2013. Urimo abarwanyi bafite inkomoko muri Uganda.

Inyeshyamba zo mu mutwe wa ADF ziracyekwaho kwivugana abaturage 19 mu Burasirazuba bwa Congo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .