Umushinjacyaha wa ICC aryamiye amajanja ku bibera muri RDC

Yanditswe na Ishimwe Israel
Kuya 24 Nzeri 2016 saa 01:23
Yasuwe : XX
0

Umushinjacyaha w’Urukiko Mpuzamahanga Mpanabyaha (ICC), Fatou Bensouda, yatangaje ko aryamiye amajanja ku mvururu zibera muri Repubulika iharanira Demokarasi ya Congo, ngo niharamuka hakozwe ibigize ibyaha biri mu bubasha bw’urwo rukiko, ahite akurikirana abazabigiramo uruhare bose.

Fatou Bensouda yabinyujije mu itangazo ryashyizwe ahagaragara kuri uyu wa Gatanu tariki ya 23 Nzeri 2016,nk’uko Radio Okapi yabyanditse.

Yagize ati “Ibiro byanjye bikora iperereza muri Repubulika Iharanira Demokarasi ya Congo kuva mu 2004 kandi umurimo wacu urakomeje. Sinzajijinganya guhita ngira icyo nkora mu gihe hazaba habonetse ibikorwa bishobora kuba bigize ibyaha biri mu bubasha bwa ICC, nzahita mfata ibyemezo byo gukurikirana abazaba babigizemo uruhare, nkurikije ihame ry’ubwuzuzanye.”

Uyu mushinjacyaha yaboneyeho guhamagarira Leta n’abatavuga rumwe gukangurira abayoboke babo guharanira umutuzo, bakirinda imvururu zishobora kubagusha mu mutego w’ibyaha byibasira inyokomuntu cyangwa imitungo, nka bimwe mu byo ku rwego mpuzamahanga.

Urukiko Mpuzamahanga Mpanabyaha (ICC) rufite ububasha ku byaha bya Jenoside, iby’Intambara n’ibyibasiye inyokomuntu, ndetse bidatinze ngo ruzatangira kujya rukurikirana abayobozi bazajya bigwizaho amasambu ya rubanda.

Mu ntangiriro z’iki cyumweru (kuwa Mbere no ku wa Kabiri) ni bwo habaye imvururu zikaze mu Mujyi wa Kinshasa, Polisi itangaza ko zahitanye abantu 32 mu gihe uruhande rw’abatavuga rumwe n’Ubutegetsi bo bavuga ko hapfuye abagera ku 100 abandi 1000 bagakomereka.

Izo mvururu zaturutse ku kugerageza kuburizamo imyigaragambyo yari yateguwe n’uruhande rw’abatavuga rumwe n’ubutegetsi barangajwe imbere n’ishyaka UDPS rya Etienne Tshisekedi, aho insoresore zahanganye n’inzego z’umutekano kakahava.

Ibyo byakurikiwe no guhagarika ibiganiro by’amahoro byari byarasabwe na Perezida Kabila, aho Umuryango wa Afurika Yunze Ubumwe, ubitera inkunga, wavuze ko bikwiye gusubikwa kugera kuwa Gatanu tariki ya 23 Nzeri, mu rwego rwo kunamira abahitanywe n’izo mvururu.

Ibyo kandi byakurikiwe no kwivana muri ibyo biganiro kwa Kiliziya Gatulika ndetse n’abatavuga rumwe n’ubutegetsi bahita basaba umunsi w’icyunamo ku rwego rw’igihugu.

Itegeko Nshinga rya RDC riteganya ko manda ya Perezida Kabila izarangira kuwa 19 Ukuboza 2016.

Umushinjacyaha mu Rukiko Mpuzamahanga Mpanabyaha (ICC), Fatou Bensouda aryamiye amajanja ku bibera muri Congo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE