Kwamamaza

Umurundikazi wahungiye mu Rwanda yatanze ubuhamya imbere ya Papa Francis muri Suède

Yanditswe kuya 1-11-2016 saa 11:13' na Rabbi Malo Umucunguzi


Umurundikazi Marguerite Barankitse, ni umwe mu bantu bane batanze ubuhamya bw’urugendo rwabo rw’ubukirisitu no gutanga imbabazi muri Suède, igikorwa gikomeye cyaranze uruzinduko rw’Umushumba wa Kiliziya Gatolika ku Isi, Papa Francis.

Hari mu ihuriro ryahuje abantu basaga 10 000 mu Mujyi wa Malmö, nyuma ya Misa yo kwibuka Martin Luther washinze idini ry’Abaporotesitanti yabereye muri Cathédrale ya Lund.

Nyuma y’ijambo rya Papa Francis n’Umuyobozi w’ihuriro ry’Aba-Luther ku Isi, Révérend Munib Younan, abitabiriye icyo gikorwa bateze amatwi ubuhamya bw’abantu bane barimo umuyobozi wa Caritas-Colombie yagize uruhare mu biganiro hagati ya guverinoma n’inyeshyamba za FARC, umuhanga mu bidukikije w’Umuhinde, impunzi y’Umunyasudani y’Epfo n’umurundi wahungiye mu Rwanda.

Radio Vatican yatangaje ko Marguerite Barankitse wabayeho mu bihe bikomeye by’ubwicanyi bushingiye ku moko mu 1993 mbere yo guhungira mu Rwanda, yagarutse ku rugendo rwe rugana imbabazi, n’uko yitangiye abo badahuje ubwoko.

Barankitse yahuye n’itotezwa mu Burundi ndetse atakaza abantu basaga 60 bo mu muryango we, ariko yiyemeza gushinga umuryango Maison Shalom wakira impfubyi zose we atitaye ku bwoko.

Yavuze ko ubwo mu 1993 habagaho ubwicanyi, yahunganye n’abana barindwi yareraga barimo bane b’abahutu na batatu b’abatutsi, akizera ko nihagira abaza kubica bari mu bwoko bumwe, abari mu bundi bazabarokora.

Ati ‘‘Nyuma haje kuza abantu bo mu bwoko bwanjye, ndavuga nti ngiye kurengera abahutu, nsohoka mbere ariko ntibanyumvise. Baramboshye, bicira imbere yanjye abantu 72.’’

Yakomeje agira ati ‘‘Najyaga mbwira bagenzi banjye nti ibi ni ubujiji, twese turi abantu kimwe, byongeye twese turi abana b’Imana, turi abakirisitu. Ni gute twicana ?’’

Nyuma ngo yibutse ko Imana yavuze ko itazigera itererana abantu bayo, aza gufata abana bose arabahungana ahishwa n’umudage, kugeza ubwo yashinze Maison Shalom agamije gufasha abana b’Abarundi bafite icyizere cyo kuzongera gutanga umucyo ku misozi y’u Burundi.

Barankitse avuga ko gutanga imbabazi atari ikintu cyoroshye, ariko kubw’imbaraga zidasanzwe bishoboka nubwo bifata igihe.

Papa Francis yari muri Suède aho yitabiriye isabukuru y’Ivugururwa ry’Abaporotesitanti aho yasabye Kiliziya Gatolika n’idini ryashinzwe na Luther kurenga amateka, bagasubiza amaso inyuma ‘‘bakemera amakosa yakozwe kandi bakagana inzira y’imbabazi.’’

Ku itariki 31 Ukwakira 1517 nibwo Umudage Martin Luther wari umuhanga mu nyigisho za kiliziya yatangaje ingingo 95 zavuguruzaga imyigishirize ya Kiliziya Gatolika yarimo ko umuntu wakoze icyaha ashobora kuronka imbabazi z’Imana atanze amafaranga runaka.

Ni ibintu byatumye acibwa muri Kiliziya Gatolika ndetse n’ubwami bw’icyo gihe bumufata nk’udakurikiza amategeko, ariko inyigisho ze zikwira u Burayi bwose, binakurikirwa n’intambara ikomeye ishingiye ku myemerere.

Mu nyandiko yashyizwe hagaragara na Kiliziya Gatolika n’Ihuriro ry’aba Luther ku Isi, rivuga ko aya makoraniro yombi “atagishyamiranye”, ndetse intego ahuriyeho ari uguhuriza abayagize ku Meza y’Ukarisitiya.

Marguerite Barankitse yatanze ubuhamya muri Suède
Papa Francis n'Umwamikazi Silvia wa Suède

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved