Umuriro uri kwaka hagati ya Perezida Kenyatta na Visi Perezida Ruto wasabwe kwegura

Yanditswe na Muhonzire Sylvine
Kuya 14 Gashyantare 2021 saa 11:06
Yasuwe :
0 0

Visi Perezida wa Kenya, William Ruto, uteganya kwiyamamariza kuba Perezida w’iki gihugu mu matora yo mu 2022, yavuze ko atazegura ku mwanya ariho nyuma y’uko Perezida Uhuru Kenyatta amusabye kuva ku mirimo ye aho gukomeza gusebya Guverinoma ye.

Ku wa Gatanu w’iki cyumweru ni bwo Perezida Kenyatta yasabye Ruto kwegura, avuga ko niba adashimishijwe n’ibyo Leta ikora yayivamo akagenda.

Ibi Kenyatta yabivuze ubwo yatangizaga ku mugaragaro ivuriro riherereye mu Ntara ya Athiru, aho yashinje Ruto kurema amacakubiri mu Banya-Kenya kuko ku ruhande rumwe ashima ibyo Leta yakoze, ku rundi akayinenga kandi na we ayirimo.

Yagize ati “Ntibyumvikana ukuntu umuyobozi yavuga indimi ebyiri kandi abwira Abanya-Kenya. Ku ruhande rumwe akavuga ngo Leta ntiyakoze ibyo yijeje abaturage, ku rundi akavuga ngo Leta yateye imbere uku na kuriya.”

“Ibi ni ukuvuga indimi ebyiri, ntabwo wavuga Guverinoma ubamo ngo ntiyageze ku byo yiyemeje, ako kanya uhite uvuga ngo twageze kuri ibi n’ibi nka Guverinoma. icyiza ni uko wakwegura.”

Nyuma y’umunsi umwe avuze ibi, Ruto na we yahise agira icyo abivugaho, ubwo yari ari mu bikorwa byamuhuje n’abaturage batuye mu Ntara ya Isiolo ku wa Gatandatu, atangaza ko atazegura kuko umwanya ariho yawushyizweho n’Itegeko Nshinga.

Yagize ati “Nzakomeza gukora nka Visi Perezida wa Kenya, kubera ko ni umwanya wanjye nashyizwemo n’amategeko.”

Ruto ariko yavuze ko nubwo atazava kuri uyu mwanya bitavuze ko yubahutse Perezida.

Ati “Nta guhangana kuri hagati yanjye n’umukoresha wanjye. Nubaha ibyemezo bya Nyakubahwa Perezida, kuko ariwe udukuriye akanafata ibyemezo byose, gusa njye nta mwanzuro we nasuzuguye.”

Uku kutumvikana hagati ya Ruto na Kenyatta kwatewe ahanini no kutavuga rumwe ku byerekeye amatora ya kamarampaka ateganyijwe kuba muri Kenya, aho Ruto adashaka ko aba cyane ko atekereza ko ashobora kuzamubuza amahirwe yo kuziyamamariza kuba Perezida wa Kenya mu 2022, bityo Kenyatta akongererwa manda yo kuyobora igihugu kandi yari yararangiye.

Kenyatta we avuga ko iyi kamarampaka igamije iterambere rya Kenya no kugabanya akaduruvayo kaba nyuma y’amatora y’umukuru w’igihugu.

Perezida Uhuru Kenyatta yayoboye Kenya kuva mu 2012 kugeza 2017, arongera atorerwa indi manda izarangira mu 2022, ari nabwo biteganyijwe ko azarangiza manda ze ebyiri yemererwa n’Itegeko Nshinga.

Perezida Kenyatta na Visi Perezida Ruto bakomeje kugaragaza ukutumvikana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .