00:00:00 IGIHE NETWORK KN KINYARWANDA EN ENGLISH FR FRANCAIS

Umuntu umwe yishwe n’igisasu mu gitero cyagabwe i Kampala

Yanditswe na IGIHE
Kuya 24 Ukwakira 2021 saa 12:09
Yasuwe :
0 0

Perezida Yoweri Kaguta Museveni yatangaje ko Leta igiye gushyira imbaraga mu gukurikirana abateye igisasu cyaguyemo umuntu umwe, abandi bagakomereka mu Mujyi wa Kampala mu gikorwa yise icy’iterabwoba.

Ku wa Gatandatu, tariki ya 23 Ukwakira 2021, ahagana saa Tatu z’ijoro [ku isaha yo muri Uganda] ni bwo mu kabari kanacuruza ibyo kurya ko mu gice ahanini gituwemo n’abantu ahitwa Komamboga mu Mujyi wa Kampala haturikiye igisasu.

BBC yanditse ko Polisi ya Uganda yatangaje ko umuntu umwe yapfuye, mu gihe abandi barindwi bakomeretse bikomeye.

Amakuru y’ibanze yerekana ko abantu batatu ari bo basize igipfunyika mu ishashi nyuma y’umwanya muto kiza guturika. Cyishe umwe, mu gihe barindwi bakomeretse bahise bajyanwa mu Bitaro bya Mulago.

Mu butumwa yanyujije kuri Twitter kuri iki Cyumweru, tariki ya 24 Ukwakira 2021, Perezida wa Uganda Yoweri Museveni yavuze ko yahawe amakuru ku byabereye mu gace ka Kwata aho muri Komamboga.

Yagize ati “Bisa nk’aho ari igikorwa cy’iterabwoba ariko tuzafata abakigabye.’’

Abashinzwe Umutekano muri Uganda ntacyo baravuga ku bo bakeka baba bari inyuma y’abagize uruhare muri icyo gitero.

Nyuma y’iturika ry’icyo gisasu, impuguke zo muri Polisi ya Uganda zageze aho cyagabwe zitangira gukora iperereza.

Ubusanzwe utubari twahagaritswe gukora muri Uganda nk’ingamba yo kurwanya COVID-19, ariko tumwe turacyakira abakiliya.

Abayobozi ba Uganda basabye abaturage kudacika igikuba ahubwo bakomeze kubahiriza amabwiriza y’amasaha y’ingendo aho basabwa kuba bari mu rugo saa Moya mu kwirinda ikwirakwira rya COVID-19.

Iki gisasu cyatewe nyuma y’aho ku wa 8 Ukwakira, Umutwe w’Iterabwoba wa “Islamic State” wigambye uruhare mu gitero cyagabwe kuri Sitasiyo ya Polisi muri Kawempe.

Nyuma Polisi ya Uganda yemeje ko hari agatero koroheje kagabwe ariko nta bagakomerekeyemo cyangwa igisasu cyaturitse.

Mu cyumweru gishize, u Bwongereza n’u Bufaransa byatanze intabaza ku baturage babyo muri Uganda, bibaburira ko hari ahashobora kugabwa ibitero by’umwihariko mu duce tugendwa cyane ndetse n’udusurwa n’abarimo abanyamahanga.

Mu mwaka wa 2010, abantu 76 biciwe mu bitero by’ibisasu byagabwe na Al-Shabaab ahantu habiri mu Mujyi wa Kampala ubwo abafana ba ruhago barebaga umukino wa nyuma w’Igikombe cy’Isi cyabereye muri Afurika y’Epfo. Iki gitero cyagabwe nyuma y’aho Uganda yohereje ingabo zayo muri Somalia muri misiyo y’Umuryango wa Afurika Yunze Ubumwe yo guhangana n’imitwe y’iterabwoba.

Umuntu umwe yishwe n’igisasu cyatewe mu Mujyi wa Kampala, mu gihe barindwi bakomeretse bikomeye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .