00:00:00 IGIHE NETWORK KN KINYARWANDA EN ENGLISH FR FRANCAIS

Umugore, imbarutso yo gushwana kwa Perezida Museveni na Kizza Besigye?

Yanditswe na Musangwa Arthur
Kuya 31 Gicurasi 2021 saa 09:39
Yasuwe :
0 0

Niba hari abantu Perezida wa Uganda, Yoweri Kaguta Museveni adashobora kwibagirwa mu buzima bwe harimo na Boniface Byanyima, umusaza wamureze ndetse agatanga umusanzu ukomeye kugira ngo abe aho ari uyu munsi.

Mu ijambo Museveni yavuze mu 2017 ubwo yasezeraga kuri Boniface Byanyima, yavuze ko yamenyanye bwa mbere n’uyu musaza ahagana mu 1959 ubwo yajyaga kwiga muri Mbarara High School aho yigishaga.

Yagize ati “Namumenye nk’umwarimu muri Mbarara High School mu 1959 ubwo najyaga muri iryo shuri mu mwaka wa mbere, icyo gihe nibwo bwa mbere nahuye nawe ariko yari yarigishije igihe kinini mbere yaho […] yaje kunyigisha, yanyigishije mu wa mbere no mu wa kabiri.”

Muri iri jambo Perezida Museveni yabaye nk’uwibagirwa kuvuga uburyo uyu musaza wamwigishije yanamufashije no mu buzima busanzwe cyane ko ariho yajyaga aruhukira rimwe na rimwe akanamuha n’amafaranga y’ishuri.

Mu kiganiro Boniface Byanyima yagiranye n’umunyamakuru Benon Herbert Oluka mu 2015 bise ‘Museveni I know’, uyu musaza yavuze ko yabaniye neza Perezida Museveni ndetse anamufata nk’umwana we kugeza ahagana mu 1990 ubwo yashwanaga n’umuryango we.

Yagize ati “Yaradusuraga cyane, yarankundaga n’umuryango wanjye, n’abana banjye. Twamufataga nk’umwana wacu.”

“Yari umusore muto ufite intego, buri gihe yageragezaga kwerekana ko ashoboye kurenza abandi banyeshuri, ndetse akagaragara nk’ufite intego mu bintu bito. Buri gihe iyo yabonaga amahirwe, yashakaga kwerekana ko ari umuntu w’ingenzi. Yashagakaga kubahwa.”

Boniface Byanyima yavuze ko ubwo se wa Museveni na nyina batandukanaga aribwo yatangiye kumufasha cyane ndetse atangira kuba mu rugo rwe mu buryo buhoraho.

Ngo mu bwana bwe Museveni yari umwana ugoranye kuko utapfaga kumenya icyo atekereza. Ati “Byamfashe igihe kugira ngo musobanukirwe kubera ko agira ibanga cyane. Ntushobora kumusobanukirwa mu gihura. Hari uruhande akwereka n’urundi agira ibanga, ku bw’ibyo byamfashe igihe kugira ngo musobanukirwe.”

Ngo na nyuma yo kujya muri Ntare School, Museveni yakomeje gusura uyu muryango ngo ndetse Boniface Byanyima akamuha ibyo akeneye kimwe n’abandi bana be. Uyu musaza yavuze ko nubwo Museveni atari azi ubwenge cyane yakundaga kwiga cyane.

Nyuma yo kuva i Dar es Salaam ngo nibwo Boniface Byanyima yatangiye kumvana Museveni ibiganiro bya politike aho ngo yakundaga cyane amatwara ya gi-communiste. Ngo mukanwa ke hahoragamo imvugo za Vladimir Lenin wayoboye Leta Zunze Ubumwe z’aba-soviyete.

Museveni yashatse kurongora Winnie Byanyima, se aramumwina

Uretse kuba mwarimu wa Museveni, Boniface Byanyima ni na se w’Umuyobozi w’Ishami ry’Umuryango w’Abibumbye rishinzwe kurwanya SIDA (UNAIDS) Winnie Byanyima, akaba n’inshuti yo mu bwana ya Perezida Museveni.

Muri iki kiganiro Boniface Byanyima yavuze ko ubwo Museveni yari akiri mu ishyamba ashaka gufata ubutegetsi, umukobwa we yafashe icyemezo cyo kumusangayo atamugishije inama.

Ati “Karagwa (Winnie Byanyima) yasanze Museveni mu ishyamba gusa ntiyambwiye ko yari agiye kubasanga. Yari ari ku ishuri, aho yari yaragiye kwiga mu Burayi nk’impunzi.”

Winnie Byanyima yagiye i Burayi nyuma y’uburakari yatewe n’urupfu rwa mubyara we witwaga James Kanyamunyu wishwe n’ubutegetsi bwa Idi Amin, gusa ngo se yaje gutungurwa n’uburyo yasanze Museveni mu ishyamba nyuma yo kurangiza amasomo muri Kaminuza ya Manchester.

Ati “Sinibuka igihe cyangwa uburyo yabasanze mu ishyamba, gusa yabaye umwe mu barwanyi, nyuma aza kujya muri Guverinoma. Ubwo bari bavuye mu ishyamba yaje hano ndamwihanangiriza. Namubwiye kutajya muri Guverinoma ya Museveni, namubwiye ko atari umuntu wo kwizera ariko yanga kunyumva.”

Boniface Byanyima yavuze ko yatunguwe n’uburyo mu 1987 Museveni yaje kumusaba ko yarongora Winnie Byanyima, mu gihe yari azi neza ko yashakanye na Janer Museveni icyo gihe witwaga ‘Kataha’.

Ati “Museveni yaje asaba ubukwe. Yashakaga kumurongora (Winnie Byanyima), ibintu ntemeraga. Nabwiye umukobwa wanjye nti Museveni si umuntu wo kwizera. Ndatekereza ko hari mu 1987 icyo gihe yari yarashakanye na Janet (Kataha). Nari mbizi.”

Boniface Byanyima yakomeje avuga ko mbere y’uko Museveni yiyizira kumusaba umukobwa we yabanje kohereza se (Amos Kaguta).

Ati “Habanje kuza se kubinsaba. Ndamubwira nti oya. Nyuma Museveni ubwo yari Perezida yiyizira aha, mubwira ko ntashobora kubyemera. Naramubwiye nti niba ushaka ku murongora, naramuka abishaka bizaba ari ibimureba njye simbishaka.”

Ibyo uyu musaza yavuze biramutse aribyo koko Museveni yaba yarashatse kurongora Winnie Byanyima mu gihe yari yaramaze gusezerana na Janet Museveni.

Museveni na Janet basezeranya muri Kanama 1973 bibaruka imfura yabo, Muhoozi Kainerugaba kuri ubu uyobora umutwe w’Ingabo zidasanzwe mu Gisirikare cya Uganda ku wa 24 Mata 1974.

Museveni na Janet barakuranye cyane ko n’amashuri abanza bayize ku kigo kimwe cya ‘Kyamate Primary School’. Nyuma baje kuburana bongera guhurira i Nairobi ari naho basuhukuriye umubano wabo.

Muri iki gihe Museveni yashakaga kurongora Winnie Byanyima, Janet Museveni yari ari mu buhunzi ku Mugabane w’i Burayi cyane ko muri Gashyantare 1981 ubwo umugabo we yatangizaga intambara yo gufata ubutegetsi, Janet Museveni yahise ahungira muri Kenya aho yabanaga n’inshuti z’umuryango, mu 1983 aza kuhava ajya kuba muri Suède aho yagumye akagaruka nyuma y’amezi ane Museveni amaze gufata ubutegetsi.

Winnie Byanyima na Museveni barakuranye, kugeza naho uyu mugabo yifuje kumurongora

Babanye mu nzu, nyuma baza gushwana

Boniface Byanyima witabye Imana mu 2017 azize guturika udutsi tw’ubwonko, yavuze ko umukobwa we yamaze igihe abana na Museveni mu gace ka Entebbe ariko nyuma baza gushwana.

Ati “Babanyeho igihe. Iyo abantu babana ntushobora kumenya neza igihe babanye, ariko barabanye Entebbe. Nyuma Karagwa (Winnie Byanyima) yaje kubona ko Museveni atari umuntu mwiza wo kubana nawe. Ndatekereza ko yaje kwibonera ibyo namubwiraga ku mico ya Museveni, yahise areka Museveni na Guverinoma ye.”

“Ubwo Museveni yabaga Perezida, nyuma y’ukwezi cyangwa abiri, yatangiye kuza hano. Yakundaga kuza kundeba buri cyumweru cyangwa buri kwezi. Bwa mbere yaje kunsaba kurongora umukobwa wanjye, ndabyanga. Ntibyamurakaje kubera ko yari abizi neza ko ntabyemera. Yabyakiriye neza kandi ntibyamubujije gukomeza kuza hano kundamutsa. Yakomeje kugaragara nk’inshuti.”

Umwuka mubi hagati ya Museveni n’umuryango wa Byanyima watangiye gufata indi ntera muri Nyakanga 1990 ubwo Guverinoma ya Uganda yigaruriga urwuri rw’uyu musaza ruherereye mu gace ka Nyabushozi yakoreragamo imirimo y’ubworozi.

Boniface Byanyima yavuze ko iki kibazo yakigejeje kuri Museveni ariko akomeza kumurerega yigira nk’aho atakizi.

Ati “Ku giti cyanjye ubwo yateraga urwuri rwanjye hari muri Nyakanga 1990, abasirikare bafite imbunda bakaza bakarujyamo. Bakubise abantu banjye, ubwo najyagayo narabibonye ko boherejwe na Guverinoma.”

Nyuma yo kugeza iki kibazo kuri Museveni akamwizeza ko azagikemura ntabikore, Boniface Byanyima yafashe umwanzuro wo kwigira aho uyu mugabo akorera muri Entebbe kugira ngo amwibutse ineza yamugiriye n’ububi bw’ibyo ari kumwitura.

Ati “Nagiye Entebbe, naka uburenganzira ninjira mu biro bye, turebana amaso ku maso namubwiye ko namaze kubona ibimenyetso simusiga ko atari umuyobozi. Ntashobora kuyobora Uganda kubera ko avangura amoko kandi akaba atari umuntu wo kwizera, namubwiye ko nciye umubano nawe ko ndetse niteguye kumurwanya.”

Iki gihe ngo Museveni mukumusubiza yagize ati “Ni gute ushobora kundwanya ? Ni gute ushobora kurwanya ubutegetsi bwanjye?" Byanyimya ngo yamusubije agira ati “Nta mbunda mfite ariko nzafatanya n’abashaka kurwanya ubutegetsi bwawe".

Iki kibazo cya Boniface Byanyima na Guverinoma ya Uganda cyaje kujya mu nkiko birangira uyu musaza atsinze ndetse ahabwa impozamarira ya miliyoni 100Shs.

Byaba ari byo yapfuye na Besigye?

Nyuma yo gushwana na Museveni, mu 1998 Winnie Byanyima yaje gusezerana kubana na Dr Kizza Besigye bari baramenyaniye ku rugamba. Uretse kuba Dr Kizza Besigye yari umusirikare ufite ipeti rya Colonel mu Ngabo za Uganda yanabaye muganga wihariye wa Perezida Museveni.

Nyuma y’imyaka ibiri arongoye Winnie Byanyima, Dr Kizza Besigye yatangiye kugaragaza ko atacyumvikana na Museveni aho yamushinjaga kuyoboresha igitugu no kubaka ubutegetsi bumushingiye. Ntibyatinze uyu mugabo yahise atangira guhatana na Perezida Museveni mu matora yo guhatanira kuyobora uganda.

Mu kiganiro yagiranye n’Ibiro Ntaramakuru byo mu Budage, Kizza Besigye yavuze ko azi umubano wihariye Museveni yagiranye n’umugore we ariko yemeza ko atari yo ntandaro y’ubwumvikane buke bwavutse hagati yabo.

Yagize ati “Yego bagiranye umubano wihariye ariko si nkeka ko uwo mubano wa Museveni na Winnie ufite aho uhuriye n’umubano wanjye nawe. Ibyo Museveni ankorera yabikorera n’undi wese batavuga rumwe.”

Nubwo bimeze gutya ariko amakuru aturuka muri Uganda avuga ko umubano mubi wa Museveni ushobora kuba uterwa n’uko uyu mugabo yanze guheba burundu Winnie Byanyima. Ibi kandi byanemejwe n’Umuvugizi wa Forum for Democratic Change (FDC) ya Besigye, Wafula Oguttu.

Mu mvugo itarimo kurya indimi, Oguttu mu 2017 yavuze ko Museveni agikunda Winnie Byanyima akaba ari nabyo byamutandukanyije na Besigye.

Ati “Museveni aracyakunda Winnie. Ntiyigeze amukuraho amaso kugeza n’uyu munsi. Ndacyeka ko Museveni yanga Besigye kubera Winnie. Kandi dutekereza ko Museveni yabonye Besigye nk’umugabo ushaka kumusuzugura ubwo yatangiraga kugaragaza ko atavuga rumwe nawe.”

Oguttu yavuze ko Museveni yari agitsimbaraye ku mubano we na Winnie Byanyima ngo uretse ko uyu mugore yaje gufata umwanzuro wo kumureka burundu.

Mu 1998 Besigye na Winnie Byanyima basezeranye kubana nk'umugabo n'umugore
Besigye yabaye mu gisirikare cya Uganda ari na muganga wihariye wa Museveni

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .