Umubano wa Ethiopia na Eritrea mu cyerekezo gishya

Yanditswe na David Eugène Marshall
Kuya 15 Nzeri 2018 saa 04:06
Yasuwe :
0 0

Umuryango w’Abibumbye uremeza ko kuri iki cyumweru, ibihugu bya Eritrea na Ethiopia bishyira umukono ku masezerano y’amahoro ashimangira bidasubirwaho umubano w’ibi bihugu.

Ni umuhango uzabera i Jeddah muri Arabia Saudite, ukazaba uhagararirwe n’Umwami w’iki gihugu Salman.

Biteganijwe kandi ko unitabirwa na Perezida wa Komisiyo ya Afurika Yunze Ubumwe Mussa Faki Mahamat ndetse n’Umunyamabanga mukuru wa Loni, Antonio Guterres.

Amasezerano yo kuri iki cyumweru, aje ashimangira umubano ibi bihugu byongeye kubyutsa muri Nyakanga 2018, nyuma y’imyaka 20 bidacana uwaka, cyane cyane bipfa akarere ka Badme Ethiopia yasaga n’aho yatwaye Eritrea ku ngufu.

Kuva aho Minisitiri w’Intebe Dr. Abiy Ahmed wa Ethiopia atorewe kuyobora iki gihugu muri Mata 2018, yihatiye gukuraho amakimbirane yari asanzwe aranga ibi bihugu by’ibivandimwe.

Abiy ni uwo mu bwoko bw’aba-Oromo, babarwa nka bumwe mu bwoko bukomeye butuye Ethiopia bwari bwarakandamijwe igihe kitari gito.

Kuri uyu wa kabiri w’icyumweru kandi, ba Perezida Abiy Ahmed na Eritrea Isaias Afwerki bafunguye imipaka bushya, nyuma y’imyaka 20 abaturage babyo batagendererana.

Eritrea yahoze itegekwa na Ethiopia yabonye ubwigenge mu 1990, ariko tumwe mu duce tw’ubutaka ibihugu bihuriyeho dukomeza kuba umuzi w’amakimbirane.

Mu 2002 Urukiko rwa Loni rwategetse uko imiterere y’imipaka igomba kumera, rutegeka kandi Ethiopia kurekura agace ka Badme ibi bihugu byapfaga, ariko Ethiopia yanga kuva ku izima.

Minisitiri w’intebe Abiy aherutse gutangaza ko nta gihindutse ashobora gusubiza Eritrea agace ka Badme, ndetse n’ahandi hari ibibazo bigashakirwa umuti mu nzira y’amahoro.

Umubano wa Ethiopia na Eritrea ukomeje kwerekeza aheza

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza