Uganda yahagaritse ibikorwa byo gushakisha Joseph Kony

Yanditswe na Mukaneza M.Ange
Kuya 20 Mata 2017 saa 12:49
Yasuwe :
0 0

Igisirikare cya Uganda cyatangaje ko cyahagaritse ibikorwa byo guhiga umuyobozi w’umutwe wa LRA, Joseph Kony ,bikekwa yihishe muri Repubulika ya Centrafrique.

Umutwe wa LRA (Lord’s Resistance Army), ni umwe mu yari yarayogoje Uganda n’ibihugu bihana imbibi, aho wicaga abantu ubashinyaguriye mu gihe abana wabajyanaga kubakoresha mu gisirikare, abakobwa bakagirwa abacakara bakoreshwa imibonano mpuzabitsina ku gahato.

Kony washyiriweho impapuro zimuta muri yombi mu 2005 n’Urukiko Mpuzamahanga Mpanabyaha, ICC kubera ibyaha by’intambara, we n’abarwanyi be babanje guhungira mu mashyamba ya Repubulika Iharanira Demokarasi ya Congo, nyuma baza kwerekeza muri Centrafrique.

Kuva mu 2012, ingabo za Uganda zifatanyije n’iza Leta Zunze Ubumwe za Amerika (US) n’Umuryango wa Afurika Yunze Ubumwe, AU, zatangiye ibikorwa byo kumuhiga bukware.

BBC dukesha iyi nkuru ivuga ko nyuma y’ukwezi ingabo za US zihisemo guhagarika ibi bikorwa, iza Uganda na zo zafashe umwanzuro wo kubireka kuko umutwe wa LRA utagifite imbaraga zahungabanya umutekano w’iki gihugu.

Ni mu gihe benshi mu barwanyi bakomeye ba LRA, bagiye barambika intwaro hasi muribo hakaba harimo na Dominic Ongwen uri kuburanishwa na ICC ku byaha by’intambara n’ibyibasiye inyokomuntu.

Itangazo ryashyizwe hanze n’igisirikare cya Uganda rivuga ko kuri ubu Kony asigaranye abarwanyi batageze ku 100, bityo ko ingabo zayo zigomba kuva muri Centrafrique kuko zasohoje inshingano zari zarahawe.

Umutwe wa LRA wavutse mu myaka 20 ishize mu Majyaruguru ya Uganda, wari ufite intego yo gushyiraho guverinoma igendera ku mategeko 10 ari muri Bibiliya. Wishe ababarirwa mu bihumbi 100, abatari bake bava mu byabo.

Umuyobozi w’umutwe wa LRA, Joseph Kony

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244