Uganda yafunze nyinshi mu mbuga z’amakuru zo kuri internet zo mu Rwanda zirimo na IGIHE

Yanditswe na IGIHE
Kuya 21 Kanama 2019 saa 11:06
Yasuwe :
0 0

Ikigo kigenzura ibijyanye n’Itumanaho muri Uganda, Uganda Communications Commission (UCC), cyandikiye ibigo bitanga serivisi za internet, kibitegeka gufunga isomwa ry’imbuga z’amakuru zo mu Rwanda zirimo IGIHE na The New Times ku bantu bari muri Uganda.

Uyu mwanzuro Uganda yawufashe mu gihe Perezida w’u Rwanda na mugenzi we wa Uganda, Yoweri Museveni bari bamaze gusinya amasezerano aganisha ku irangizwa ry’umwuka mubi umaze igihe hagati y’ibihugu byombi, mu muhango wabereye i Luanda muri Angola kuri uyu wa Gatatu.

Ni amasezerano yasinywe hagati ya Perezida Paul Kagame na Yoweri Museveni, hari na Perezida João Lourenço wa Angola, Félix Tshisekedi wa RDC na Denis Sasso Nguesso wa Repubulika ya Congo.

Mu kiganiro kuri telefoni, Umuyobozi ushinzwe Itangazamakuru muri UCC, Ibrahim Bbosa, yabwiye The New Times ko habayeho iryo hagarikwa.

Ati “Twandikiye ibigo bitanga serivisi za intenet tubasaba guhagarika izo mbuga.”

Yavuze ko izo mbuga ngo zifite amakuru abangamiye umutekano w’igihugu wa Uganda. The New Times na IGIHE ni zimwe mu mbuga z’amakuru zikorera kuri internet ubu udashobora gusoma uri muri Uganda.

Ni igikorwa cyafashwe nk’igishyira akabazo ku bushake icyo gihugu gifite mu kubahiriza amasezerano yashyizweho umukono n’ibihugu byombi kuri uyu wa Gatatu, hagamijwe kuzahura umubano.

Mu byo u Rwanda rushinja Uganda harimo gukorera iyicarubozo Abanyarwanda, gutera inkunga imitwe igamije guhungabanya umutekano warwo no kubangamira ubucuruzi bw’Abanyarwanda. Ibyo bigendana no kuba bimwe mu binyamakuru bya Uganda bikora icengezamatwara ribangamiye u Rwanda, binyuze nko guha ibiganiro abantu bashakishwa n’ubutabera bw’u Rwanda.

Umuyobozi w’Urwego Ngenzuramikorere, RURA, Lt Col Patrick Nyirishema, yavuze ko bamaze gusaba amakuru bagenzi babo muri Uganda, ngo hamenyekane impamvu izo mbuga zafunzwe.

Ni igikorwa avuga ko gihabanye n’amasezerano ‘yasinywe n’abayobozi bacu uyu munsi’.

IGIHE ni rumwe mu mbuga zafunzwe muri Uganda
The New Times ntabwo ifunguka ku muntu ushaka kuyisura ari muri Uganda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza