Uganda: Umunyamerika yatawe muri yombi ashinjwa kubangamira Leta

Yanditswe na Bukuru JC
Kuya 24 Werurwe 2021 saa 09:21
Yasuwe :
0 0

Umugabo ufite ubwenegihugu bwa Leta Zunze Ubumwe za Amerika, yatawe muri yombi n’inzego z’umutekano za Uganda ashinjwa kubangamira Leta.

Guy Smith yafatiwe mu gace ka Fort Portal gaherereye mu Burengerazuba bw’igihugu, ashinjwa kugira uruhare mu bikorwa bibangamiye Guverinoma, nk’uko itangazo Polisi yashyize hanze kuri uyu wa Mbere ribigaragaza.

Polisi yatangaje ko iperereza rigikomeje ku bikorwa bibangamiye ubutegetsi akekwaho ari nayo mpamvu yatawe muri yombi ngo abibazweho.

Uganda yatangaje ko Ambasade ya Amerika muri icyo gihugu ibizi kandi ngo bamusuye aho afungiye.

Umugore wa Smith ari we Sharon Tusiime yabwiye AFP ko uwo mugabo w’imyaka 63 yavanywe mu rugo mu masaha y’igitondo ku Cyumweru, afatwa n’abantu bambaye igisirikare bari no mu modoka zitagira ibiziranga n’ibirahure by’umukara.

Ni imodoka bivugwa ko zimaze iminsi zifashishwa n’inzego z’umutekano mu gushimuta abatavuga rumwe na Leta.

Perezida Yoweri Museveni aherutse kwemera ko hari abaturage batabwa muri yombi mu buryo budasanzwe bashinjwa kugambanira Leta.

Tusiime yavuze ko umugabo we Smith nta bikorwa bya Politiki abarizwamo, ko umwanya we munini yawumaraga areba amakuru anakora siporo.

Yavuze ko umugabo we aherutse kubagwa ijisho ndetse ngo umunsi bamutwara yari yambaye ikanzu yo kwa muganga. Ngo abagiye kumutwara banze ko anahabwa umuti w’amaso ndetse n’uw’indwara z’umutima.

Guy Smith yafashwe n'inzego z'umutekano za Uganda ashinjwa kubangamira Leta. Yari aherutse kubagwa ijisho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .