Uganda: Umugabo wahanganiye intebe na Janet Museveni mu Nteko, yishwe n’umugore we

Yanditswe na Ishimwe Israel
Kuya 30 Kanama 2016 saa 01:48
Yasuwe : XX
137 71

Hannington Musasizi Kanyate, umwe mu bahatanaga na Janet Museveni, umufasha wa Perezida Museveni ku mwanya wo guhagararira agace ka Ruhaama mu Nteko Ishinga Amategeko muri 2011, yaraye yitabye Imana nyuma yo guterwa icyuma n’umugore we amusanze aryamanye n’umukozi wo mu rugo rwabo.

Iri sanganya ngo ryabaye ku wa Kane w’icyumweru gishize, aho ngo byose byaturutse ku kuba uyu mugabo yaribagiwe kujya gucyura umugore we utwite ku kazi aho akorera.

Mu masaha ya saa tanu z’ijoro ryo ku wa 25 Kanama 2016, Joan Najjuma yahamagaye umugabo we kuri telefone ntiyamwitaba, ahita afata icyemezo cyo gutega imodoka imugeza mu rugo rwabo ruherereye muri Lugoba, mu murwa mukuru Kampala.

Ageze mu rugo, uyu mugore ngo yatunguwe no gusanga umugabo we aryamanye n’umukozi wabo witwa Annet Turyamushaba.

Uyu mugore yahise afatwa n’uburakari, ajya mu gikoni azana icyuma agitera umugabo we mu mutima aramukomeretsa bikomeye.

Abaturanyi ba nyakwigendera babwiye Chimpreports ko Musasizi yagerageje gukiza amagara ye bikanga, hanyuma umukozi we akajya kwihisha mu bwiherero aho yatabarije abaturanyi ngo bamutabare umugore [Nyirabuja] arashaka kumwica.

Abaturanyi ngo baratabaye basanga uyu mugore ngo yazimije amatara yo hanze mu gipangu ndetse ngo yanga ko binjira mu rugo rwe. Gusa nyuma ngo byabaye ngombwa ko binjira bakoresheje ingufu.

Bageze muri urwo rugo basanze Musasizi ari kuva cyane, aho ngo Najjuma yahise ahamagara umushoferi w’imodoka amujyana ku bitaro bya Mulago ariko amerewe nabi cyane.

Joan Namawuba, Umuyobozi wa Polisi mu gace ka Kawempe, ngo yageze ahabereye aya marorerwa maze ahasanga ibase yuzuye amaraso.

Nyuma y’iminsi ibiri avurirwa muri ibyo bitaro, Musasizi yashizemo umwuka kuri iki cyumweru, akaba asigiye umugore we abana babiri.

Ubwo hakorwaga iperereza ngo uyu mugore yisobanuye avuga ko umugabo we yahohotewe n’amabandi ndetse ngo akaba yanajyanywe ku bitaro bya Mulago.

Gusa inzego z’umutekano zahise zita muri yombi uwo mugore ndetse n’umukozi we zibakurikiranyeho icyaha cy’ubwicanyi.

Biteganyijwe ko Musasizi azashyingurwa muri iki cyumweru mu karere ka Ntungamo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE