Uganda: Polisi irashinjwa guhohotera no gufunga abakora uburaya nyuma yo kubasambanya

Yanditswe na Ishimwe Israel
Kuya 8 Nzeri 2016 saa 06:54
Yasuwe : XX
0

Umunya-Kenya wiyita Fatia amaze imyaka itatu akorera uburaya ku mihanda y’i Kampala muri Uganda, avuga ko atagitinya guhohoterwa n’abakiliya be cyangwa kwandura virusi itera SIDA ahubwo asigaranye ubwoba bw’iyicarubozo, abakora uyu mwuga bakorerwa n’abapolisi nyuma yo kubasambanya.

Uyu mukobwa w’imyaka 25 yagize ati “Abapolisi batangira kugushinja, bavuga ko uburaya butemewe mu gihugu. Bamwe baranagusambanya ntibakwishyure ahubwo mwarangiza bakakujyana kuri sitatiyo ya Polisi.”

Fatia avuga ko kuri ubu yamaze kumenya icyo gukora mu gihe abapolisi bamufashe kuko ngo ahamagara nimero itishyuzwa yo mu biro bishinzwe kurengera abakora uburaya mu gihugu bakamufasha kwibutsa abapolisi ko gukorerwa ihohoterwa bitemewe kandi ko na ruswa itemewe no ku bandi baturage muri rusange.

Ibi ngo iyo byanze Fatia ahamagara umwe mu bakiriya be bakomeye akamufasha kumvisha Polisi ko igomba kumurekura.

Umuvugizi wa Polisi muri Uganda, Andrew Felix Kaweesi ahakana iri hohoterwa rivugwa n’uwiyita Fatia, icyakora yemera ko hashobora kubaho imikorere mibi nk’iyo kuri bamwe mu ba polisi bakomeye.

Yagize ati "Polisi ntifite muri gahunda yayo guhohotera abakora uburaya ku mihanda. Abahuye n’iki kibazo bagomba kukigeza kuri polisi ishami rishinzwe imyitwarire kandi ni ukuri ntawe uzabahanira ko ari indaya. Tuzumva uko ikirego giteye hanyuma tugikurikirane.”

Muri Uganda, Uburaya ni icyaha gihanirwa n’amategeko ku rwego rukomeye, icyakora no gufata ku ngufu, kwaka ruswa, gukubita cyangwa no kwica abameze nka Fatia nabyo ntibyemewe nk’uko byemezwa n’Imiryango irengera Uburenganzira bwa muntu.

Kugeza ubu muri Uganda indaya zashyiriweho uburyo bushya bw’ikoranabuhanga buzifasha kudahohoterwa, abakora uyu mwuga bagera ku 1000 kuri ubu bahawe udukoresho tubikwaho amajwi n’inyandiko(Memory cards) turiho inyigisho zibafasha kumenya uko bakwirinda guhohoterwa, kwirinda kwandura SIDA, cyangwa gusama inda zitateguwe.

Izi nyigisho ziri mu buryo bw’amajwi, inyandiko ndetse n’amashusho byose mu ndimi zitandukanye mu rwego rwo kugirango zibashe kugera ku ngero z’abakora uyu mwuga benshi batandukanye.

Oliver Musoke uyobora ikigo cya Lady Mermaid’s Bureau cyazanye izi nyigisho nawe wahoze mu buraya yagize ati "Barazisoma, barazireba ndetse bakazumva bikabafasha gukora akazi kabo mu mutekano, utu dukarita tugera ku bantu benshi kurenza kubagira inama amaso ku maso.”

Itegeko rya Uganda ryo muri 1950 rivuga ko ufatiwe mu buraya afungwa imyaka irindwi.

Minisitiri wa Leta ushinzwe Amahame ndangamyitwarire n’ubunyangamugayo, Simon Lokodo we yatangaje ko Leta igomba kuzajya ifunga indaya ndetse n’abakiliya bazo.

Ikigo gishinzwe Uburenganzira bw’abagore muri Uganda,WONETHA gitangaza ko abakora uburaya barenga 85 bamaze kukigezaho ibirego byo guhohoterwa n’abapolisi guhera mu kwa mbere, n’ubwo ngo hari n’ibindi birego byinshi bitandikwa.

Umwuga w'uburaya ntiwemewe muri Uganda
Itegeko rishya rivuga ko indaya n'umukiliya wayo bagomba gutabwa muri yombi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza