Igenzura ryagaragaje ko nta mpinduka muri manda nshya ya Museveni

Yanditswe na Uwishyaka Jean Louis
Kuya 4 Ukwakira 2016 saa 07:08
Yasuwe :
0 0

Ikigo cyo muri Uganda gishinzwe kugenzura ibikorwa bya guverinoma UGMP (Uganda Governance Monitoring Programme) cyatangaje ko nyuma y’iminsi 100 Perezida Yoweri Museveni arahiriye kuyobora manda ya gatanu nta gishya yari yagaragaza mu byo yiyemeje kuzakora.

Ikinyamakuru The EastAfrican cyanditse ko ibyo byatangajwe tariki ya 16 Nzeri ubwo Arthur Larok, Umuyobozi Mukuru wa Action Aid muri Uganda, yatangazaga ibyo igenzura bakoze ryabonye, bagaragaje ko mu byagenzuwe byose kudashyirwa mu bikorwa ari cyo cyiganje.

Berekanye ko kugeza ubu nta kintu kigaragaza uburyo imitangirwe ya serivisi muri guverinoma izanozwa nk’uko yari yarabyiyemeje.

Ubwo yarahiriraga manda nshya tariki ya 12 Gicurasi 2016, Perezida Museveni yatangaje ko agiye guca ruswa ndetse n’itinda ry’ishyirwa mu bikorwa ry’ibiba byemejwe gukorwa, ibintu n’ubundi byaranze ubutegetsi bwe mu myaka 30 amaze ayobora Uganda.

Uretse ibyo kandi serivisi z’ubuvuzi muri iki gihugu zakunze kurangwamo ibibazo n’uburezi bugenda busubira inyuma.

Gusa Museveni yavuze ko ikibazo kimuraje inshinga ari ukuzamura ubukungu bw’iki gihugu bwari bwarazahaye yibanda cyane ku kugabanya igiciro gihanitse cy’amashanyarazi, guteza imbere ubuhinzi ndetse no kuzamura urwego rw’inganda.

Museveni ubwo yarahiraga yagize ati ”Ngarutse ku bukungu, tugomba gukuraho inzitizi ebyiri zirimo ruswa mu bayobozi ndetse n’idindira ry’ishyirwa mu bikorwa ry’imyanzuro iba yafashwe. Ayo makosa abiri adindiza abaturage kandi akanaca intege abashoramari. Ibi ni ukugambanira igihugu, nzahangana na byo.”

Ibibazo binyuranye birimo kudashyira mu bikorwa gahunda , itangwa rya serivisi zitanoze biri mu byagiye bigarukwaho cyane n’abatavuga rumwe n’ubutegetsi mu gihe cyo kwiyamamaza, gusa Perezida Museveni yabasubizaga avuga manda ya 2016-2021 ari igihe cy’impinduka.

Gusa abakoze ubugenzuzi ku byo Museveni amaze kugeraho mu minsi 100 amaze arahiriye manda nshya, bagaragaza ko ibyo yiyemeje byose bisa n’aho ari ibitekerezo bishaje bitewe n’uko kugeza ubu nta gishya kigaragara.

Larok avuga ko bigoye kwemeza ko iyi manda ya gatanu ya Museveni izaba itandukanye n’izabanje bitewe n’uko ngo nta kimenyetso na kimwe kibigaragaza.

Ibyo Museveni yiyemeje akimara kurahira ngo nta na kimwe arakora

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244