Uganda: Minisitiri yambuye abaturage ambulance yari yabahaye nyuma yo gutsindwa amatora

Yanditswe na Rosine Ingabire
Kuya 3 Gashyantare 2021 saa 12:04
Yasuwe :
0 0

Umunyamabanga wa Leta muri Minisiteri ushinze Ishoramari no kwegurira ibigo bya Leta abikorera, Evelyn Anite, yasubiranye ambulance yari yahaye abaturage bo mu Mujyi wa Koboko, nyuma yo gutsindwa amatora.

Mu mpera z’umwaka ushize, Anite yitabiriye amatora y’ibanze y’ishyaka riri ku butegetsi NRM, ashaka guhagararira iryo shyaka mu bakandida bagombaga kwiyamamariza umwanya w’ubudepite ku rwego rw’igihugu.

Ntabwo byamukundiye kuko yatsinzwe na mugenzi we Dr Charles Ayume. Uko gutsindwa byaramurakaje bituma mu matora y’abadepite muri Koboko, ashyigikira umukandida wigenga Mr Charles Yakani.

Daily Monitor yatangaje ko Anite uburakari bwakomeje kuba bwinshi kugeza ubwo ajya kwambura abaturage ba Koboko imodoka itwara abarwayi yari yarabahaye. Iyo modoka yayitanze muri Nzeri umwaka ushize.

Bivugwa ko iyo modoka abaturage bayambuwe mu cyumweru gishize. Abashinzwe ubuzima muri Koboko bavuze ko hashize iminsi aho iyo modoka yaparikwaga itahaboneka, icyakora ngo nta butumwa bwa Anite barabona bubamenyesha ko imodoka ayisubiranye.

Meya wa Koboko Wilson Sanya we yemeje ko imodoka Anite yayisubiranye. Yagize ati “Ndemeza ko imodoka yasubijwe Anite. Ubwo mperuka kuvugana n’uwayitwaraga, yanyemereye ko yayisubijeyo abitegetswe na Minisitiri.”

Anite yanze kugira icyo atangaza kuri ayo makuru ubwo yahamarwaga n’itangazamakuru. Akarere ka Koboko gasanganywe izindi modoka zitwara abarwayi zirindwi.

Iyi modoka Anite yari yayihaye abaturage muri Nzeri umwaka ushize
Anite yiyamamaje ashaka guhagararira agace ka Koboko mu nteko ariko atsindwa mu matora y'ibanze y'ishyaka NRM

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .