Kwamamaza

Kaminuza zo mu Rwanda ziri kureshya abarimu bo muri Uganda, haravugwa aba Makerere

Yanditswe kuya 14-11-2016 saa 12:01' na Tombola Felicie


Kaminuza zo mu Rwanda zatangiye kureshya abarimu bigisha muri Kaminuza muri Uganda, aho banuganuga abo muri Makerere imaze ibyumweru bibiri ifunzwe biturutse ku itegeko rya Perezida Museveni, nyuma y’imyigaragambyo y’abarimu n’abanyeshuri batishimiraga imibereho yabo.

Ku itariki ya Mbere Ugushyingo 2016, nibwo Perezida wa Uganda Yoweli Museveni yafunze Kaminuza ya Makerere, avuga ko agamije kurengera ubuzima bw’abantu n’ibintu, yongeraho ko izafungurwa ari uko hatanzwe andi mabwiriza.

Abanyeshuri bari bamaze iminsi bigaragambya bamagana uko babayeho, mu gihe abarimu bo bigaragambirizaga kudahembwa neza bijyana no kudahabwa agahimbazamusyi kabo.

Umuyobozi ushinzwe amasomo muri kaminuza ya Makerere, Louis Kakinda, yemeje ko impamvu abarimu bo muri Makerere bari gusezera ku mirimo ari ukubera umushahara muto.

Ati” Impamvu abarimu bari kwegura ni ukubera umushahara muto”

Nyuma y’ibyumweru bibiri iyi kaminuza ifungiwe imiryango n’umukuru w’igihugu, kuri ubu ngo imwe muri Kaminuza zo mu Rwanda yatangiye kurambagiza abarimu muri kaminuza za Leta, kugira ngo bajye kuyigishamo.

The New Vision ivuga ko Kaminuza ya Kigali, yatanze itangazo ishakisha abarimu bo kwigisha amasomo y’ icungamutungo n’ibaruramari, uwigisha ikoranabuhanga (information technology), uwigisha ibyo gutanga amasoko n’amategeko ndetse n’indi myanya y’umuyobozi ushinzwe abanyeshuri n’ireme.

Iyi kaminuza ivuga ko umushahara uzaba ubanyuze bitewe n’uruhare bazagaragaza mu kazi kabo ko kwigisha no gutanga uburezi bufite ireme ku banyeshuri no kugira uruhare mu bushakashatsi kaminuza ikora.

Impuguke mu by’uburezi bw’amashuri makuru na za kaminuza, zemeza ko ibi bisa no korosora uwabyuka ku barimu benshi bo mu makaminuza ya Leta muri Uganda, ku buryo ngo batari buzuyaze kujya mu Rwanda nka kimwe mu bihugu bihemba neza abarimu ba za kaminuza muri aka karere.

Muri raporo yashyizwe ahagaragara mu 2012 n’abayobozi bungirije b’amakaminuza muri Kenya, yerekanye ko imishahara n’uduhimbazamusyi tw’abarimu bahoraho muri kaminuza mu Rwanda, buri kwezi bahabwa amadorali ya Amerika 4,900 abarirwa mu manyarwanda hafi miliyoni enye, muri Kenya bahembwa amadolari 2,200, muri Tanzania ho bahabwa amadorali 3,200 mu gihe muri Uganda abarimu nk’abo bahembwa amadorali 1,150.

Prof. A.B Kasozi, wahoze ayobora inama nkuru y’igihugu ishinzwe amashuri makuru muri Uganda, avuga ko ibyo bisanzwe bibaho n’ahandi ku isi kuba umwarimu yajya aho abona ibyo yifuza bimunyuze.

Bitewe n’umushahara muto, Kaminuza ya Makerere yatakaje abarimu b’imena 25 muri 2011 kandi ibyo bigira ingaruka kuko abanyeshuri batabona abarimu bahagije babigisha.

Nubwo bimeze bityo Minisitiri ushinzwe amashuri makuru muri Uganda, Dr. Chrysostom Muyingo, yatangaje ko nta mpungenge bafite ko abarimu bo muri Makerere bashobora kwigendera mu gihe iyi kaminuza igifunze.

Ati“Nta kigomba gutera ubwoba, nta n’umwe ushobora kugenda kuko turi mu biganiro nabo kandi barashaka ko dufata igisubizo kirambye ku bibazo byabo kugira ngo Makerere yongere kuba igicumbi cy’ubumenyi, ubushakashatsi n’udushya mu burezi .”

Abarimu bigishaga muri Makerere yafunzwe ngo bashobora kujya mu Rwanda ahavugwa umushahara utubutse mu barimu ba za kaminuza

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved