Kwamamaza

Uganda:Igitanda Perezida Kagame yararagaho mu yisumbuye cyamuritswe

Yanditswe kuya 27-09-2016 saa 08:39' na Emma Marie Umurerwa


Igitanda Perezida Paul Kagame yararagaho yiga mu mashuri yisumbuye mu Burengerazuba bwa Uganda cyamuritswe mu gihe Uganda yitegura kwizihiza umunsi mpuzamahanga w’ubukerarugendo kuri uyu wa 27 Nzeri 2016.

Uyu munsi mukuru urizihirizwa mu Karere ka Mbarara ahahereyere ishuri ryisumbuye ry’abahungu rya Ntare, rimwe mu mashuri yisumbuye akomeye muri Uganda.

Nka kimwe mu biraranga uyu munsi, KT press ivuga ko abashinzwe ubukerarugendo bamuritse igitanda Perezida Kagame yarararagaho hamwe n’icya mugenzi we Perezida Yoweri Museveni uyobora Uganda.

Abasura ibi bikorwa boroherejwe kureba ibitanda abanyeshuri babiri baje kuvamo abakuru b’ibihugu bararagaho, mu gihe muri icyo gihe nta wabitekerezaga.

Perezida Kagame yize muri Ntare School kuva mu 1972 kugeza mu 1976, aho yararaga mu cyumba cya mbere icyo gihe cyitwaga “Stanley House”, cyaje guhindurirwa izina ubu kikaba cyitwa “Pioneer House”.

Abakuriye ubukerarugendo muri Uganda bizeye ko iki gitanda ndetse n’ibindi bizarushaho kongera umusaruro kironka mu bukerarugendo, aho bashaka ko Uganda ikomeza kwitwara neza mu bukerarugendo mu karere.

Ibihugu bigize Umuryango wa Afurika y’Iburasirazuba biheruka kwemeza ishyirwaho rya viza imwe kuri ba mukerarugendo bifuza gusura ibi bihugu, aho yatangiye gukoreshwa muri Uganda, Kenya n’u Rwanda, uyifatiye mu gihugu kimwe agatembera no mu bindi bisigaye.

Hari ubutumwa buri ku rukuta rwegereye igitanda cya Perezida Kagame buvuga ahanini uko yari ameze, buti “yakundaga kuba acecetse kandi akagenza ibintu gake.”

Ubu butumwa kandi buvuga ko akenshi yabaga ari mu mikino myinshi ariko cyane cyane basketball na cricket.”

Mu Rwanda hari umushinga wo kuhubaka ishami rya Ntare School aho hamaze gukusanywa asaga miliyoni $1.3, Perezida Museveni akaba yaratanze $200 000 mu gikorwa cyo gukusanya inkunga cyabaye muri Werurwe mu mwaka ushize.

Icyumba Perezida Kagame yararagamo
Mu cyumba Perezida Kagame yararagamo handitse amagambo asobanura uko yitwaraga

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved