Uganda: Hatangajwe uburyo Gen. Kale Kayihura yafashwe

Yanditswe na Iradukunda Desire
Kuya 14 Kamena 2018 saa 12:16
Yasuwe :
0 0

Itangazamakuru ryo muri Uganda ryanditse abandi bavuga byinshi ku ifatwa rya Gen. Kale Kayihura uheruka gusimbuzwa ku buyobozi bwa Polisi ya Uganda, nyuma y’uko kuri uyu wa Gatatu yajyanwe na kajugujugu ku cyicaro gikuru cya gisirikare i Mbuya.

Gen. Kayihura yakoreye igipolisi cya Uganda imyaka igera kuri 13 ndetse ni nawe wamaze kuri uwo mwanya igihe kinini kurusha abandi, ariko muri Werurwe Perezida Museveni yamusimbuje Okoth Ochola wari umwungirije.

Nk’uko itangazo ryashyizwe hanze n’Igisirikare cya Uganda kuri uyu wa Gatatu ribivuga, ntiryemeza niba Gen. Kale afunzwe, gusa rivuga ko yahamagajwe n’Umugaba Mukuru w’Ingabo nubwo impamvu yabyo itahise itangazwa.

Umuvugizi w’Ingabo za Uganda, UPDF, Brig. Richard Karemire, yavuze ko Gen. Kale akiri mu gisirikare cya Uganda, ko yiberaga ahitwa Kashagama mu Karere ka Lyantonde guhera ku wa 15 Werurwe ubwo yari amaze gukora ihererekanyabubasha ku buyobozi bukuru bwa Polisi ya Uganda.

Yakomeje agira ati “Ejo ku wa 12 Kamena 2018, yasabwe kwitaba Umuyobozi Mukuru wa UPDF Gen. David Muhoozi ku cyicaro gikuru cy’ingabo i Mbuya. Kajugujugu yoherejwe kumuzana ariko ubwo yahageraga, Gen. Kale yari yagiye i Mbarara maze ihita igaruka ku birindiro by’ingabo zo mu kirere bya Entebbe.”

“Iyo kajugujugu uyu munsi yongeye koherezwa i Kashagama kandi yagarutse amahoro i Kampala nawe ayirimo.”

Kuva Gen. Kale Kayihura yagezwa i Kampala ntiharatangazwa iherezo ryabyo. Bivugwa ko ku wa Kabiri abasirikare basatse bikomeye hotel izwi nka Courtyard International Hotel muri Lyantonde, kuko byakekwaga ko uyu musirikare mukuru ari umukiliya wayo uhoraho, ariko ntibahamusanga.

Abo basirikare ngo babajije abakozi ba Gen Kayihura aho yaba aherereye, bababwira ko yagiye Mbarara, ndetse bishoboka ko nawe yari yamenye ko agiye gufatwa.

Inzego z’umutekano ngo zatanze itegeko ryo kugenzura neza ko ari i Mbarara koko, hanategekwa kugenzura ku mupaka wa Uganda ngo atagira igihugu na kimwe cy’abaturanyi yinjiramo.

Gen. Kayihura ngo yahise afata umwanzuro wo gusubira Lyantonde, ahurira n’abasirikare mu nzira, bamwerekeza mu kigo cya gisirikare cya Makenke i Mbarara ari naho kajugujugu ya gisirikare yamuvanye imujyana i Kampala.

Bivugwa ko Perezida Museveni yirukanye Gen. Kale Kayihura ku buyobozi bukuru bw’igipolisi amushinja ibyaha birimo kurebera umutekano muke mu gihugu.
Bijyanye n’abantu bakomeye bamaze iminsi bicwa muri Uganda, ngo bikekwa ko hari uruhare yaba yarabigizemo kuko bishinjwa abantu be ba hafi.

Ibinyamakuru byo muri Uganda byatangaje ko ifatwa rya Gen. Kale ryabanjirijwe n’inama ikomeye yahuje abayobozi b’inzego z’umutekano yayobowe na Perezida Museveni ubwe, yagaragarijwemo ibitagenda mu mutekano n’imvano yabyo.

Hari abandi bayobozi bamaze gufatwa bivugwa ko ari aba hafi ya Gen Kayihura, barimo Col. Ndahura wahoze ayobora ishami ry’Iperereza ku byaha (Crime Intelligence) na Richard Ndabwoine wari ukuriye ishami ry’iperereza ku byaha by’ikoranabuhanga.

Hakomeje kuvugwa ko Gen. Kale Kayihura yaba yatawe muri yombi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza