Uganda: Bobi Wine yemeje ko azahangana na Museveni mu matora yo mu 2021

Yanditswe na Umwali Zhuri
Kuya 24 Nyakanga 2019 saa 05:07
Yasuwe :
0 0

Depite Robert Kyagulanyi wamenyekanye nk’umuhanzi Bobi Wine, yatangaje ko aziyamamariza kuba Perezida wa Uganda mu matora ateganyijwe mu 2021, aho azaba ahanganye na Yoweli Kaguta Museveni umaze imyaka isaga 30 ku butegetsi.

Bobi Wine yakunze kuvuga ko ashobora kwiyamamaza agahangana na Museveni ashinja imiyoborere mibi, aho agaragaza ko igihe kigeze ngo urubyiruko rwa Uganda rufate iya mbere mu iterambere ry’igihugu.

Mu kiganiro yagiranye n’abanyamakuru kuri uyu wa Gatatu, Bobi Wine yagize ati “Mu izina ry’abaturage ba Uganda, ngiye guhatana nawe (Museveni) mu matora aciye mu mucyo mu 2021.”

Bobi Wine afite imyaka 37 y’amavuko. Mu 2017 nibwo yatsinze amatora yo kuba umudepite, yinjira muri politiki mu buryo bweruye ndetse atangira guhangana na Museveni ku buryo bukomeye byanamuviriyemo gufungwa inshuro zitari nke.

Bobi Wine ubwo yaganiraga n'itangazamakuru mu rugo rwe

Bobi Wine yatangaje ko abizi neza ko gutangaza kandidatire kwe azahuriramo n’imbogamizi nyinshi, ariko ko atewe umuhate n’abaturage bamubwira ko akwiye kubabera umuyobozi.

Ati “Nzi ibizazane nzahura nabyo mu guhangana na Museveni gusa ntewe umuhate n’Abanya-Uganda bagaragaza ko ndi umuyobozi bifuza… kandi nemeye ko nzahangana ndetse nkanatanga kandidatire yanjye.”

Yakomeje avuga ko mu “matora ya Perezida ataha, nzaba ndi ku mpapuro zitorerwaho nk’umukandida ndetse bigendanye n’uburyo dushyigikiwe nka People Power, intsinzi ni iyacu.”

Bobi Wine yakomeje avuga ko yamaze gushyira hamwe itsinda ry’abantu bazakwira igihugu cyose batangaza ubutumwa bugamije impinduka.

Muri iki kiganiro, Bobi Wine yakomeje avuga ko yahisemo kugikorera mu rugo rwe nyuma y’uko hotel zitandukanye yasabye ko yakoreramo zagiye zimwangira.

Mu ntangiriro z’uyu mwaka, Urukiko rw’Ikirenga muri Uganda rwakuyeho ingingo y’imyaka ushaka kuba Perezida adakwiye kuba arengeje (aho atagombaga kuba arengeje 75), biha uburenganzira Museveni bwo kuba yakongera akiyamamaza mu 2021.

Bobi Wine amaze kugwiza abantu bamushyigikiye, barangwa no kwambara ingofero zitukura
Bobi Wine kuri uyu wa Gatatu yari yakoranyirije abantu benshi mu rugo rwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza