00:00:00 IGIHE NETWORK KN KINYARWANDA EN ENGLISH FR FRANCAIS

Uganda: Abanyamakuru bashyize ahabona iby’ubwicanyi bwakozwe na Polisi barageramiwe

Yanditswe na Bukuru JC
Kuya 3 Kamena 2021 saa 08:39
Yasuwe :
0 0

Umwanditsi Mukuru w’Ikinyamakuru Daily Monitor, kiri mu bya mbere bikomeye mu byigenga muri Uganda, Tabu Butagira, yahamagajwe na Polisi y’igihugu cye ngo ahatwe ibibazo nyuma yo gutangaza inkuru ijyanye n’ubwicanyi bwakorewe i Kampala umwaka ushize.

Uretse umwanditsi mukuru wa Daily Monitor, umuyobozi ushinzwe ibikorwa bya sosiyete ya Nation Media Group nyiri iki kinyamakuru, Tony Glencross, na we yahamagajwe, bombi bakaba bakurikiranyweho gutangaza amakuru y’ibinyoma nubwo ba nyir’ubwite bo bavuga ko ihamagarwa ryabo ryaba rishingiye kuri politiki.

Inkuru y’iperereza ry’itsinda rya BBC Africa Eye, yahawe izina rya ’Three Killings in Kampala’ (cyangwa ubwicanyi butatu i Kampala), yatangajwe ku itariki ya 31 Gicurasi na Daily Monitor.

Yagaragaje ibimenyetso by’uko inzego zishinzwe umutekano za Uganda zarashe zitarobanura ku bantu batambukaga, mu gikorwa cyo kubibasira cyabereye i Kampala mu Ugushyingo 2020, zica ndetse zikomeretsa abantu batitwaje intwaro, barimo abagore n’abana.

Nk’uko BBC ibitangaza, Leta ya Uganda yatangaje ko inzego zayo zishinzwe umutekano zari zihanganye n’abateza imidugararo, kandi ko abiciwe ku muhanda i Kampala bishwe n’amasasu yayobye". Nta gihamya ihari y’uko abo bantu barindwi barashweho ku muhanda i Kampala bari barimo guteza imidugararo.

Ihamagazwa rya Butagira na Glencross rigaragaza ukwiyongera k’uburyo abanyamakuru bo muri Uganda bakomeje kwibasirwa mu kazi kabo, cyane cyane abatangaza inkuru z’abatavuga rumwe na Perezida Yoweri Museveni cyangwa zinenga leta ye.

Umuryango w’abanyamakuru batagira umupaka (Reporters Without Borders/Reporters Sans Frontières) uvuga ko hagati y’ukwezi kwa cumi na kumwe mu 2020 n’ukwezi kwa gatatu mu 2021, wabaruye ibikorwa hafi 40 byibasira abanyamakuru muri Uganda, birimo 21 byo kubahutaza hakoreshejwe ingufu n’ibikorwa umunani byo gufungwa.

Uwo muryango ushyira Uganda ku mwanya wa 125 mu bihugu 180 ku rutonde rwo kubahiriza ubwisanzure bw’itangazamakuru ruzwi nka World Press Freedom Index, ukavuga ko "ibikorwa byo gutera ubwoba n’urugomo ku banyamakuru byabaye hafi buri munsi [muri icyo gihe] muri Uganda".

Ikinyamakuru Daily Monitor cyatangaje birambuye inkuru ku bwicanyi bwo mu kwezi kwa cumi na kumwe, ndetse kigenda gitangaza inkuru zibanda ku buzima bwa benshi muri abo bishwe.

Polisi ya Uganda yavuzweho gukora ibikorwa by'ubwicanyi muri Kampala
Umwanditsi Mukuru w’Ikinyamakuru Daily Monitor, Tabu Butagira yahamagajwe na Polisi ngo abazwe ku nkuru yatangajwe ku bwicanyi bwa polisi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .