Uganda: Abakoresha imbuga nkoranyambaga bashobora kujya basora amashilingi 100 ku munsi

Yanditswe na IGIHE
Kuya 12 Mata 2018 saa 09:00
Yasuwe :
0 0

Guverinoma ya Uganda irateganya kujya isoresha ku munsi amashilingi 100 abantu bose bakoresha imbuga nkoranyambaga nka WhatsApp, Facebook, Twitter, Skype na Viber.

Kuri uyu wa Kane Umunyamabanga wa Leta ushinzwe igenamigambi, David Bahati, yabwiye itangazamakuru ko aya mashilingi azajya acibwa ku munsi buri SIM card ikoresha internet ku mbuga nkoranyambaga.

Perezida Museveni aherutse kuvuga ko gusoresha abakoresha imbuga nkoranyamabaga bigamije kongera umusoro ukusanywa ndetse no guca intege abazikoresha bakwirakwiza ibihuha.

Uyu mugambi biteganyijwe ko Inteko Ishinga Amategeko niwemeza uzatangira kubahirizwa muri Nyakanga uyu mwaka. Bamwe mu mpirimbanyi z’uburenganzira bwa muntu bavuga ko Museveni ashaka gukomeza kuniga ubwisanzure bwo gutanga ibitekerezo no gucecekesha abatavuga rumwe na we.

Minisitiri w’imari, Matia Kasaija, yabwiye Reuters ko atemeranya n’abavuga ko gusoresha abakoresha imbuga nkoranyambaga bigamije gukumira abantu ku gukoresha internet.

Yagize ati “Turashaka amafaranga yo gusigasira umutekano w’igihugu no kongera amashanyarazi kugira ngo abaturage babashe gukoresha imbuga nkoranyambaga ari benshi, kandi kenshi.”

Mu bantu miliyoni 41 batuye Uganda, abagera kuri 23.6 bakoresha telefoni ngendanwa naho miliyoni 17 bakoresha internet. Gusoresha imbuga nkoranyambaga nibitangira gushyirwa mu bikorwa bizakusanya umusoro hagati ya miliyari 400 Shs na miliyari 1400 Shsb buri mwaka.

Tanzania ni ikindi gihugu cyo muri aka karere cyateye intambwe yo kugenzura ibijyanye no gukoresha internet kuko mu kwezi gushize yatangije itegeko ry’uko buri muturage ukoresha blog cyangwa website azajya yishyura uruhushya rwa miliyoni imwe y’amashilingi buri mwaka ni ukuvuga amadorali ya Amerika 440.

Guverinoma ya Uganda irateganya kujya isoresha ku munsi amashilingi 100 abantu bose bakoresha imbuga nkoranyambaga nka WhatsApp, Facebook, Twitter, Skype na Viber

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza